SAN JUAN 20:10-20

¹⁰Yoje, mohuicaje in monextilinijmes ca capic chantitataloaya.

¹¹Huan María moquetzaya pa in cueva (ostul) pa quiahuac, chocatataya. Huan quinami chocaya, mopachuc pa quitasquiaya pa in ostul laijtic.

¹²Huan nepa quinmitac ome ilanahuatinijmes in cielo lalaquentili ca tzotzomajli iztatataya, molalijtataloaya se pa capa catani Jesús itzontecon huan se capa catanijme icxihuajmes, pani capa catani lastataya Jesús imijquil.

¹³Huan yehuanten quilije: —Nito, ¿leca tichocatica? Quinmilic: —Pampa quijcuanije noTeco huan amo nicmati capa quilalije.

¹⁴Quinmilic inon, momalinac huan pa itepotzcon quitac Jesús moqueztataya. Ma yoje, amo quimatiaya cataya Jesús.

¹⁵Huan Jesús quilic: —Nito, ¿leca tichocatica? ¿Aqui tictemujtica? María quijtuaya pampa yihual yec in lacal hual quiztinemiaya in lajcotiyan, huan quilic: —Tata, sinda tel tiquihuicac, xichili capa ticlalic huan nehual nicuicatías.

¹⁶Huan Jesús quilic: —María. Huan yihual momalinac, quilic ca lajtol hebreo: —¡Rabboni! —hual quinequi quijtúa ¡Lamaxtini!

¹⁷Jesús quilic: —Amo xicaya tichquitzquitica, pampa ayamo nilejcuc capa unca noTajtzin. Axcan, xía capa cate nocnían, xiquinmili pampa nilejcus pan cielo capa unca noTajtzin huan anmoTajtzin huan capa unca noDios huan anmoDios.

¹⁸Cuaquinon uyajtiquisac María in magdalena pa quinlamachiltis in monextilinijmes, quinmilic: —¡Nel niquitac in Tata! —huan quinmilic pampa yihual quilic innojen lajtomes.

¹⁹Huan cataya tiolac pa in tonali, in tonali hual quinpehualtía in chicue tonalijmes, huan in monextilinijmes quipialoaya tzactataya in calijtic capa cataloaya pampa momajtiloaya. Quijtuloaya cuajnesi in judíos quinmitalosquiaya. Jesús nesic huan moquetzac lajco capa yehuanten, quinmilic: —Ma Dios anmitzmaca mochi hual cuali huan ma anmijchihuili mochi hual cuali.

²⁰Huan quinmilic inon, quinnextilic imajmajuan huan ilanasticali. Yoje quipialoaya míac paquilisli in monextilinijmes pampa quitaloaya Jesús.