San Juan 20:1-30

¹Na noming, dzi loga ni sman, gabee caas ruꞌ zu, gua Li nu bruu Magadán ruꞌ baa ni Jesuuz. Orzeꞌ bzaac ñi nu bi bdugyash gyitaꞌ nu rsoow ruꞌ baa zeꞌ.

²Orzeꞌ gush ñi carer yaañ lo Simo̱o̱ Bed, gal nu lo ya̱ tuubaꞌ yu nu rsyaꞌ lo Jesuuz, yu nu dzi razañ lagy mi zeꞌ. Orzeꞌ nañ rab ñi de̱: ―¡Bloo dem cuerp ni Shuaan den nañ gyerbaa za nu dem! Na ¿cyu cuic raso̱o̱ ca bicy dem ñii? ―nañ.

³Orzeꞌ Bed gal nu ya̱ za de̱ za güi̱i̱ ruꞌ baa zeꞌ.

⁴Orzeꞌ rup laa de̱ brush de̱ carer za̱, tees ya̱ bded lo̱ lo Bed. Orzeꞌ bruꞌña̱ ruꞌ baa loga la.

⁵Orzeꞌ bzaab tiilya̱ nu bgüi̱i̱ nañ gyerbaa zeꞌ. Zeꞌ bzaaca̱ se sab ziꞌl nim nguaañ. Tees wanchu̱ꞌ nañ gyerbaa zeꞌ.

⁶Orzeꞌ par icha̱ bruꞌña Simo̱o̱ Bed. Orzeꞌ lueg la guꞌy nañ gyerbaa zeꞌ. Nunu niꞌ ziꞌl bzaac yu sab zeꞌ nguaañ.

⁷Nunu bzaacaꞌy negy nu ptiish dey too Jesuuz nguaa reñ ñi nu sab nim nunu nap nach cyup ñi nguaañ.

⁸Orzeꞌ gazeꞌ nu niꞌ ziꞌl guꞌ ga̱ꞌ ya̱; mas laab ya̱ bruꞌña̱ loga la ruꞌ gyerbaa zeꞌ. Orzeꞌ bzaaca̱ de nu ndeꞌ. Orzeꞌ guña lagya̱ nu byabañ mi.

⁹Tees de̱ ya̱ gabee nigul gyet lag de̱ cuen lac yaruu de riidz ni Ñgyoozh nu rniiñ nu mi zeꞌ rlagy ñi nu gyabañ mi.

¹⁰Orzeꞌ bish cya de̱ ya̱a̱ de̱ par yuꞌ.

¹¹Orzeꞌ Li zeꞌ gusuñ ruun ñi par ich roꞌ ni gyerbaa zeꞌ. Lat nu ruun lañ zeꞌ, orzeꞌ bzaab tiily ñi bgüiiñ nañ gyerbaa zeꞌ.

¹²Orzeꞌ bzaac ñi cyup anc nañ gyerbaa zeꞌ. Zu dey negy cacy. Zub dey zeꞌ nu gubish cuerp ni Jesuuz. Tub yu zub yu zeꞌ nu gubish toom. Zeꞌ tuubaꞌy zub yu par zeꞌ nu gubish gyiꞌm.

¹³Orzeꞌ de anc zeꞌ nay rab yu Li: ―Biñ mñaa, ¿la gyiꞌ, lagu ruun ru? ―na dey. Orzeꞌ na Li: ―Gun za nu mbecy Shuaana̱, nunu wagad lagya̱ ca bicy dem mi ―nam.

¹⁴Na ornu blazh mniiñ de riidz zeꞌ, orzeꞌ bish cyañ bgüiiñ par ich ñi. Orzeꞌ bzaac ñi nu zu Jesuuz. Tees wangyuꞌ loñ ti laab mi.

¹⁵Orzeꞌ na Jesuuz rab mi ñii: ―Biñ mñaa, ¿la gyiꞌ, lagu ruun ru? ¿Cyu ryub ru? ―nam. Orzeꞌ mnii tooñ nu ndeꞌ tub mbecy nu ricy riiñ lat de ya mni nu nash zeꞌ. Orzeꞌ nañ: ―Zeꞌ benu ru gua nur cuerp nim, orzeꞌ mnii lo̱ ca bicy ru ñii, gun orzeꞌ ya̱ cha gyi̱ cuerp zeꞌ ―nañ.

¹⁶Orzeꞌ na Jesuuz rab mi ñii: ―¡Li! ―nam. Orzeꞌ bish cyañ bgüiiñ lom. Orzeꞌ mnii nuñ mi nu riidz hebreo: ―¡Rabuni! ―nañ. Riidz zeꞌ, ndeꞌ yaruuñ moscuel.

¹⁷Orzeꞌ na Jesuuz rab mi ñii: ―Bzaan yaa ya̱, gun gaal zi nigul gya̱ lo Ñgyoozh uza̱. Tees na yaa niir lo de bicya̱ nu bi gya̱ ga̱ꞌ lo biñ nu nac uza̱, gal nu uz der: lo biñ nu nac Ñgyoozh ne̱, gal nu Ñgyoozh ni de ru ―nam.

¹⁸Orzeꞌ Li nu bruu Magadán gush nez ñi yaa tooñ rishlo de yu nu rsyaꞌ lom. Mniiñ lo dey nu bzaac ñi Shuaan den. Nunu mnii gaꞌñ lo dey de coz nu mniim looñ.

¹⁹Na ornu bi becheñ ni laab dzi loga ni sman zeꞌ, orzeꞌ byatublaazh de yu nu rsyaꞌ lom nañ tub yuꞌ. Nunu nicy psoow dey roꞌ nu nac nu rdzib dey lo de yu zub lo ni de mbecy Israeel. Orzeꞌ Jesuuz bruꞌñam gusum lat dey. Orzeꞌ nam rab mi dey: ―¡Gyel ri zu briñ lat der! ―nam.

²⁰Ornu blazh mniim riidz zeꞌ, orzeꞌ blyuum yaam lo dey nunu blyuu gaꞌm rit lyush mi lo dey. Orzeꞌ tonaꞌ la bet lagy dey nu bzaac dey Shuaan den.

²¹Orzeꞌ na gaꞌ Jesuuz rab mi dey tuubaꞌ tir: ―¡Gyel ri zu briñ lat der! Gal nu Ñgyoozh uza̱ bzuu nez mi ya̱ yapa̱ gyishlombecy ii, ndeꞌ nu niꞌ ziꞌl ya̱ gzuu neza̱ der char lat de mbecy nu yuꞌ gyishlombecy ―nam.

²²Orzeꞌ blaam lo dey. Orzeꞌ nam: ―Na rica̱ Espiriit Yon ni Ñgyoozh nu gac num der.

²³Benu de ru gyicy sulagy ru cyi ca na tub mbecy, orzeꞌ Ñgyoozh gyicy sulagy mi niy. Zeꞌ benu wayicy sulagy der ni dey, orzeꞌ niꞌ Ñgyoozh wayicy sulagy mi ni de yu zeꞌ ―nam.

²⁴Na lo trocyup de yu nu rsyaꞌ lom, tub yu ndeꞌ Tomaas, yu nu rnii dey cuach. Orzeꞌ yu zeꞌ sac yu lat dey ornu bruꞌña Jesuuz.

²⁵Despuees, orzeꞌ deꞌ zir de losaꞌy nu rsyaꞌ lom byoo dey rishloy coz nu bzaac dey. Orzeꞌ na dey: ―Bi bzaac de̱ Shuaan den ―na dey. Tees Tomaas nay rab yu dey: ―Tees benu wazaca̱ zeꞌ nu guud güii ni yaam nu bzub bey nunu benu waneꞌ mbiza̱ zeꞌ nu guud güii zeꞌ nim, nunu benu waneꞌ ya̱a̱ zeꞌ nu guud güii ni rit lyush mi, orzeꞌ rila wayeña̱ lagya̱ de riidz nu rnii der ―nay.

²⁶Na ornu bzaꞌ shuñ dzi na, orzeꞌ byatublaazhaꞌ de yu nu rsyaꞌ lom laabaꞌ nañ yuꞌ zeꞌ. Orzeꞌ gazaꞌ Tomaas riy lat dey. Nunu ni ziꞌl noow nicy de roꞌ ni yuꞌ nu yuꞌ dey. Orzeꞌ bruꞌña Jesuuz gusum lat dey. Orzeꞌ nam: ―¡Gyel ri zu briñ lat der! ―nam.

²⁷Orzeꞌ nam rab mi Tomaas: ―Tomaas, mneꞌ mbiz ru lo rya̱a̱ ii, nunu güii la na ya̱a̱. Bzaab yaar lo̱ nunu mneꞌ yaa ruꞌ rit lyusha̱. Cueꞌ gac ru mbecy nu wacheña lagy, sinu guc mbecy nu zeña lagy ―nam.

²⁸Orzeꞌ na Tomaas rab yum: ―¡Ru nac ru Shuaana̱ nunu nac ru Ñgyoozh ne̱! ―nay.

²⁹Orzeꞌ na Jesuuz rab mi yu: ―¿A guña lagy ru na par nu bzaac lar ya̱? Dzi ni de mbecy nu rzeña lagy sinu wacsac lay ―nam.

³⁰Jesuuz zañ tonaꞌ la nusuriidz bicy mi lo rgüii la de yu nu rsyaꞌ lom nunu de nu ndeꞌ wanca gaꞌñ lo gyicy ii.