SAN JUAN 19:4-21

⁴Joon gangó¹o Pilato caluu tún¹ ngafee'¹³i tsá² Israel, jin'²in: ―Tyaan²aan' cwáain¹, tyiin³duu 'in tsañʉʉ'¹ no 'e litsaa²mo‑'oo' 'e jo gatsa'³aa tsaa² tya'a jiin'¹³ coon²¹.

⁵Joon gacwo'ɨ́ɨ¹ Jesús 'e inʉʉ do 'e 'yʉ' tyíi¹i corona lɨ tóon¹, joon tyi'²i 'mɨ'² nʉʉ'¹ do. Joon gajin'² Pilato sɨɨ'²¹ɨ 'in tsá² Israel do: ―¡Lo‑o siin'¹³in 'in tsañʉʉ'¹ do!

⁶Joon mo ganii¹in 'in tyʉ'³ to² untsá² joongɨ 'in 'ɨɨ'¹³ do Jesús joon ga'láa² 'wii²¹² 'oo¹o tá², jin'in: ―¡Cwotáan²in tsaa' crúu¹³ 'ino! ¡Cwotáan²in tsaa' crúu¹³ 'ino! Joon gajin'² Pilato sɨɨ'²¹ɨ 'in tsá² do: ―'Naa' jeei¹duu', joon cwotéen¹naa' 'ido tsaa' crúu¹³ yaanaa'. Pe jna‑a cwáain¹ tyiia jo gatsa'³aa tsaa² tya'a jiin'¹³ coon²¹.

⁷Pe 'in tsá² Israel do gañii¹i: ―Sá² coon²¹ ley tyii'i, joon 'e ley do jin'²in 'e 'ná¹ júun²in 'ido tsʉ gajmee¹mo 'ña'a Jóon¹on Dios.

⁸Joon mo ganúu²un Pilato 'e júu³ lo 'goo'¹gɨ 'áai¹.

⁹Joon ga'í²i tún¹ palacio tya'a joon gaunngɨɨ¹ɨ, sɨɨ'²¹ɨ Jesús: ―¿Xiiafu seen²¹u? Pe Jesús do jo gañii¹i jiin'¹³xʉ.

¹⁰Joon Pilato gajin'²in: ―¿'Ee lɨ' jo ngɨ́ɨ¹³'ɨ? ¿Tɨ jo ñí²'i 'e tɨɨ²¹moo tyʉ'²ʉʉ to² taan²u tsaa' crúu¹³ sɨ laa²¹²moo 'nʉ 'ee?

¹¹Joon Jesús‑gɨ gañii¹i: ―'Nʉ‑ʉ jo lí² tyʉ'²'ʉ to² jna wa'a jo cwoo'¹³i Dios tyi'i. Tsʉ 'wii'¹³ joon fee'¹gɨ tsaa² tya' 'in tsá² 'in gajajée¹i jna tyani'i lagɨ tsaa² tyi'i.

¹²Tsifu joon ga'láa² Pilato 'wii²¹² 'noo'¹on xiiala lí² laai²¹ Jesús. Pe 'in tsá² Israel do ga'oo¹o, jin'²in: ―¡Wa'a láa²u 'ino jo tyʉ́² seen²¹u coon'¹³ 'in tyʉ'² to² nifu tyíin¹ Roma! ¡Doñi'iin 'in jmee¹i 'ña'a rǿøi¹³ la jmoo¹o 'ido, faa'²¹a 'laa'²¹ tya' 'in tyʉ'² to² nifu tyíin¹ Roma!

¹³Joon mo ganúu²un Pilato júu³ tya'a, joon gatyʉ'²ʉ to² 'láa² tsajée¹i Jesús fu lɨ jmoo¹o 'ii'²¹ tya' tsá². Joon do‑o gacwoo¹o Pilato ni 'mosíi¹³ tya'a ijmáa¹a 'ii'. Ni 'wó² do lɨ si'² 'mosíi¹³ tya'a taa'¹³ jmai'² cuun²¹² coo'¹³. Joon do‑o galisii²¹ tsá² faa'²¹a jmíi¹ hebreo, Gabata.

¹⁴Ningóo¹o itɨ́² tyíia² ñi'¹ cwoun'ló¹ jmɨɨ²¹² pascua. Joon gajin'² Pilato sɨɨ'²¹ɨ 'in tsá² Israel do: ―¡Lo‑o siin'¹³ rǿøi¹³ tyi'naa'!

¹⁵Pe 'idogɨ ga'oo¹o tá², jin'²in: ―¡Cwojúun²mo 'ino tsaa' crúu¹³ tya'a! ¡Cwojúun²mo 'ino tsaa' crúu¹³ tya'a! Pilato do gajin'²in: ―¿Tɨ 'iin²¹²naa' wa'a jngaa'¹³na rǿøi¹³ tyii'? Pe 'in tyʉ'² to² untsá² do gajin'²in: ―Jo rǿøi¹³ xeei'gɨ seein²¹ tyijna'a jiin'¹³ 'in tyʉ'² to² nifu tyíin¹ Roma lɨ́ɨ¹i rǿøi¹³ tyijna'a.

¹⁶Lɨ gatséi¹ gajoon'¹³ Pilato Jesús tya' 'in tsá² do wa'a téen¹in 'ido tsaa' crúu¹³. Joon 'in tsá² do gajée¹mo Jesús.

¹⁷Gacwo'ɨ́ɨ¹ Jesús tyaan¹an crúu¹³ tya'a, tsalíin² coon²¹ lɨ sii²¹ Mootyi² 'Lɨɨ²¹². Joon coon'¹³ jmíi¹ hebreo sii²¹ Gólgota.

¹⁸Joon do‑o gateen¹in tsaa' crúu¹³ caan²mo coon'¹³ gái¹gɨ tsañʉʉ'¹, jmai'² jaain²¹ la cataain²¹² caai¹ Jesús.

¹⁹Joon gatyʉ'²ʉ Pilato to² 'e toon²¹²on tsá² coon²¹ júu³ yʉʉ'¹³ tyi² crúu¹³ tya' Jesús 'e jin'²: “Jesús tsá² Nazaret, Rǿøi¹³ tya' tsá² Israel.”

²⁰Joon fúu¹mo tsá² Israel gauntsáa¹a 'e júu³ do tsʉ 'e júu³ do lɨ 'nɨ¹ 'ii'¹³ jmíi¹, jmíi¹ hebreo, jmíi¹ griego joongɨ jmíi¹ latín. Joon lɨ tyan' ciudad do lɨ gateen¹in tsá² Jesús tsaa' crúu¹³.

²¹Tsʉ 'wii'¹³ joon 'in tyʉ'² to² untsá² tya' tsá² Israel gajin'²in sɨɨ'²¹ɨ Pilato: ―Jo tóon¹³'on 'e júu³ do 'e jin'² “Rǿøi¹³ tya' tsá² Israel.” 'E tyʉ́²gɨ wa'a tóon¹³'on: “'Iin 'in gajin'²in 'e lɨ́ɨ¹i Rǿøi¹³ tya' tsá² Israel.”