San Juan 19:2-34

²Suldaru awane pu tɨt ippat kit Jesúspa kɨzpukin sɨnnat kit ishtam kwaksham kwaninta.

³Uspane Jesús tura kasha aat kit ussa ishnat kit kaizara: —Wat kɨntɨre. Nune Judío awawa ɨninmika i, kizara. Uspane paiña matsɨhkin kuzara chihtɨkasa.

⁴Pilatone paiña yalkis mamasa pianamal Judío awa tukin puz kit kaiznara: —Mɨzhain. Mama suldaruruzne Jesústa ayuktas ukkanazi. Nane ussa u iztakin ukkamtu, u us chinkas kwail kitchira piankamanapa.

⁵Jesús Pilato wakinkas, awaruzpa wakinkas pianarawane, uspane Jesús kɨzpura pu tɨt sɨnat kit Jesústa ishtam kwaksham kwaninta. Pilatone usparuza kaiznara: —An ampura iztain.

⁶Pariya ɨnintuzkas Dios katsa yalkin kiwaintuzkas ussa izarawane, ka kwianamɨzta: —Ussa kurishta patpiantari, kizara. Pilatone kaiznara: —Umin ussa pizat kit kurishta patpiantain. Nane us chinkas kwail kitchi kaiznamtus.

⁷Judío awa ɨninturuzne ussa sɨnkaara: —Aune Moisés ɨninta aizpa mɨjmakpas. Sun ɨnimkin parɨt aizpa akwa, usne irawa, “nane Dios painkul ish” kiztu akwa. Us Dios painkul chi akwa, usne kwail kiz kit irawa.

⁸Sun mɨrawane, Pilatone an akkwan ishkwat.

⁹Mamasa paiña ɨnintukin nap kit Jesústa mɨmara: —¿Nune mɨntas mas? Jesúsne chinkas sɨnkarachi.

¹⁰Katmizna Pilatone ussa kaizta: —¿Nawa sɨnkamtuchikish? Mɨzha. Nane nua chɨhtninshinas. Nakas nua tɨra patpianninshinas.

¹¹Jesúsne sɨnkara: —Dios nua ɨninapa naratchine, nune nawa kwail kishinachi. Katmizna nawa chɨhkatmikane nukin anza kwailmika i.

¹²Sun urain Pilato Jesústa chɨhtshimtukas, Judío awa ɨninturuzne ka kwiannamɨzta: —An ampura chɨhttane, nune, Roma pɨpulura katsa mikwawa izmumika chi i. An Jesús muntɨtmika mikwa namshimtune, nune Roma pɨpulura katsa ɨninmikawa izmumika chi i.

¹³Sun pit mɨrawane, Pilatone ɨt kit paiña ɨnimkin uzta. Usne paiña ɨnimkin Jesústa kana ɨnpa ɨninta. An ɨnimne “sak uk” muntɨt. Judío awa pitta Gabata muntɨt.

¹⁴Paizka payu azi. Mamaz payura Pascua pishta taiztu. Pilatone Judío awaruza kaiznara: —U mikwara iztain. Ussa sappamtuchikas, an kuntɨtmikane u mikwa i.

¹⁵Uspane ka kwianara: —Inapa, inapa. Tɨra patpiantain. Pilatone mɨmanara: —¿U mikwara tɨra patpianshinasa? Pariyawa ɨnintuzne sɨnkaara: —Aune mamaz mikwasha mɨshimtuchimakpas. Au mikwane Cesar i.

¹⁶Suasne Pilato Jesústa chɨhkatpane, Roma suldaruruzne ussa mɨlara, kurishta patpiannapa.

¹⁷Jesúsne Jerusalén pɨpulukis puz kit kurish mut kit ɨzara nura. An ɨzane “KƗZPU SƗH” muntɨt. (Judíowa pitne Gólgota muntɨt.)

¹⁸Suane uspane ussa kurishta patpianara. Mamaz paas awara Jesúspa pamals kurishta patpianara.

¹⁹Pilatone an pit panapa ɨninta, kurishta patnapa. An pitne ka parɨt: AN JESÚSNE NASARET PƗPULURAS AZI. USNE JUDÍO AWAWA ƗNINMIKA I.

²⁰Uspane pɨpulu kashara Jesústa tɨra patpiantara. Katmizna akkwan Judío awane sun pit parɨt aizpa izara. Uspane sun pitta Judío awa pitparakas, Roma awa pitparakas, Griego awa pitparakas parɨt.

²¹Katmizna Judío pariyawa ɨnintuzne Pilatora kaizara: —“Judío awawa ɨninmika” pamun. Usne “nane Judío awawa mikwa ish kizta,” ka pari.

²²Pilatone sɨnkanara: —Na parɨt aizpa nukkultui.

²³Jesústa tɨra patpianarawane, suldaruruzne paiña pĩn sappat kit ampara suldaruruzpain naiyara. Uspane paiña kwaksham paimpa watsara. Kwakshamne sɨptachin kwara.

²⁴Suldaruruzne usparuzpain kaizara: —Sun puttɨt pĩn pihshpiztuchimakpas. Salna ɨzhain, mazain sun pĩn kana kinpa. Sun kitpane, Dios pitta parɨt aizpa ka kirɨt: “Ap pĩn usparuzpain naiyara. Salara ap puttɨt pĩn kana kinpa.” Suldaruruzne sunkana kiara.

²⁵Jesúspa akkuhshkas paiña aizpihshkas Jesús tɨra patpiantukin kunara. Maríakas, Cleofaspa ashampa, Maríakas Magdalena pɨpuluras tuazi.

²⁶Jesúsne paiña akkuhshta izta. Nane, paiña kammumikane, kasha kun kirau. Usne nawa pashira. Suasne Jesúsne paiña akkuhshta kaizta: —Mɨzha. Anne up painkulkana i.

²⁷Suasne Jesúsne nawa kaizta: —Mɨzha. An ashampane up akkuhshkana i. Sun urain nane ussa mɨlta ap yaltakima.

²⁸Sun kitpane, Jesúsne sun urain wan Dios ussa kinpa ɨninta aizpa pailtɨt piankamta. Suasne usne ka kaizta: —Kwazi kiltus, kizta, Dios pɨnkɨhta parɨt aizpa kinpa.

²⁹Makin waz uzazi tish vinokasa. Suldaruruzne aks tɨ piz kit tɨra pimpuh puntakimain ippara. Pimpuhta tish vino paran kit Jesúspa pitta panak kit tukninara.

³⁰Jesúsne vino kwaiz kit kaizta: —Mane na wan kishimtu aizpa kirɨt me. Kɨzpu waintawane, ira.

³¹Maza payu we, Pascua pishta izna. Pascua pishtane Judío awawa katsa pishta azi. Katmizna Judío awaruzne kurishta irɨttuza kihshninshiara, kwaizkulmu payura kurishta tuamanpa. Katmizna uspane Pilatora paikuara, mazara ɨninna usparuzpa ñampɨra tɨkasa kalpianapa, an ãĩn ianapa, tas tain kihshanapa.

³²Suasne suldaruruzne paas Jesúskasa tɨra patpiantaruza aat kit usparuzpa ñampɨra kalpianara.

³³Jesústa ɨakane, suldaruruzne ussa irɨtta izara. Katmizna paiña ñampɨra kalpianarachi.

³⁴Maza suldaruruztas Jesúspa kuishtiyaskin aks kwiz tɨkasa para. Sun urain aimpikas kwazikas kuishtiyaskis puzta.