Text copied!
CopyCompare
Masas Pit Jesucristowa - San Juan - San Juan 19

San Juan 19:10-42

Help us?
Click on verse(s) to share them!
10Katmizna Pilatone ussa kaizta: —¿Nawa sɨnkamtuchikish? Mɨzha. Nane nua chɨhtninshinas. Nakas nua tɨra patpianninshinas.
11Jesúsne sɨnkara: —Dios nua ɨninapa naratchine, nune nawa kwail kishinachi. Katmizna nawa chɨhkatmikane nukin anza kwailmika i.
12Sun urain Pilato Jesústa chɨhtshimtukas, Judío awa ɨninturuzne ka kwiannamɨzta: —An ampura chɨhttane, nune, Roma pɨpulura katsa mikwawa izmumika chi i. An Jesús muntɨtmika mikwa namshimtune, nune Roma pɨpulura katsa ɨninmikawa izmumika chi i.
13Sun pit mɨrawane, Pilatone ɨt kit paiña ɨnimkin uzta. Usne paiña ɨnimkin Jesústa kana ɨnpa ɨninta. An ɨnimne “sak uk” muntɨt. Judío awa pitta Gabata muntɨt.
14Paizka payu azi. Mamaz payura Pascua pishta taiztu. Pilatone Judío awaruza kaiznara: —U mikwara iztain. Ussa sappamtuchikas, an kuntɨtmikane u mikwa i.
15Uspane ka kwianara: —Inapa, inapa. Tɨra patpiantain. Pilatone mɨmanara: —¿U mikwara tɨra patpianshinasa? Pariyawa ɨnintuzne sɨnkaara: —Aune mamaz mikwasha mɨshimtuchimakpas. Au mikwane Cesar i.
16Suasne Pilato Jesústa chɨhkatpane, Roma suldaruruzne ussa mɨlara, kurishta patpiannapa.
17Jesúsne Jerusalén pɨpulukis puz kit kurish mut kit ɨzara nura. An ɨzane “KƗZPU SƗH” muntɨt. (Judíowa pitne Gólgota muntɨt.)
18Suane uspane ussa kurishta patpianara. Mamaz paas awara Jesúspa pamals kurishta patpianara.
19Pilatone an pit panapa ɨninta, kurishta patnapa. An pitne ka parɨt: AN JESÚSNE NASARET PƗPULURAS AZI. USNE JUDÍO AWAWA ƗNINMIKA I.
20Uspane pɨpulu kashara Jesústa tɨra patpiantara. Katmizna akkwan Judío awane sun pit parɨt aizpa izara. Uspane sun pitta Judío awa pitparakas, Roma awa pitparakas, Griego awa pitparakas parɨt.
21Katmizna Judío pariyawa ɨnintuzne Pilatora kaizara: —“Judío awawa ɨninmika” pamun. Usne “nane Judío awawa mikwa ish kizta,” ka pari.
22Pilatone sɨnkanara: —Na parɨt aizpa nukkultui.
23Jesústa tɨra patpianarawane, suldaruruzne paiña pĩn sappat kit ampara suldaruruzpain naiyara. Uspane paiña kwaksham paimpa watsara. Kwakshamne sɨptachin kwara.
24Suldaruruzne usparuzpain kaizara: —Sun puttɨt pĩn pihshpiztuchimakpas. Salna ɨzhain, mazain sun pĩn kana kinpa. Sun kitpane, Dios pitta parɨt aizpa ka kirɨt: “Ap pĩn usparuzpain naiyara. Salara ap puttɨt pĩn kana kinpa.” Suldaruruzne sunkana kiara.
25Jesúspa akkuhshkas paiña aizpihshkas Jesús tɨra patpiantukin kunara. Maríakas, Cleofaspa ashampa, Maríakas Magdalena pɨpuluras tuazi.
26Jesúsne paiña akkuhshta izta. Nane, paiña kammumikane, kasha kun kirau. Usne nawa pashira. Suasne Jesúsne paiña akkuhshta kaizta: —Mɨzha. Anne up painkulkana i.
27Suasne Jesúsne nawa kaizta: —Mɨzha. An ashampane up akkuhshkana i. Sun urain nane ussa mɨlta ap yaltakima.
28Sun kitpane, Jesúsne sun urain wan Dios ussa kinpa ɨninta aizpa pailtɨt piankamta. Suasne usne ka kaizta: —Kwazi kiltus, kizta, Dios pɨnkɨhta parɨt aizpa kinpa.
29Makin waz uzazi tish vinokasa. Suldaruruzne aks tɨ piz kit tɨra pimpuh puntakimain ippara. Pimpuhta tish vino paran kit Jesúspa pitta panak kit tukninara.
30Jesúsne vino kwaiz kit kaizta: —Mane na wan kishimtu aizpa kirɨt me. Kɨzpu waintawane, ira.
31Maza payu we, Pascua pishta izna. Pascua pishtane Judío awawa katsa pishta azi. Katmizna Judío awaruzne kurishta irɨttuza kihshninshiara, kwaizkulmu payura kurishta tuamanpa. Katmizna uspane Pilatora paikuara, mazara ɨninna usparuzpa ñampɨra tɨkasa kalpianapa, an ãĩn ianapa, tas tain kihshanapa.
32Suasne suldaruruzne paas Jesúskasa tɨra patpiantaruza aat kit usparuzpa ñampɨra kalpianara.
33Jesústa ɨakane, suldaruruzne ussa irɨtta izara. Katmizna paiña ñampɨra kalpianarachi.
34Maza suldaruruztas Jesúspa kuishtiyaskin aks kwiz tɨkasa para. Sun urain aimpikas kwazikas kuishtiyaskis puzta.
35Nane, kainammmikane, wan izta aizpa parɨt ish. Na kaizta aizpa watcha i, ukas nɨjkulanapa.
36Sun kiarɨt, Dios pɨnkɨhta parɨt aizpa kirɨnpa. Ka parɨt: “Paiña sɨh kalamanazi.”
37Mamaz pajte Dios pitta ka parɨt: “Uspane kuishtiyaskin aks kwiz tɨkasa parɨtmikasha izanazi.”
38Sun kitpane, Joséne, Arimatea pɨpuluras atmikane, Pilatora paikwara, Jesústa mu kihshat kit kamnapa. Joséne, Jesúspa kammumika azi. Judío awa ɨninturuzpa ishkumtu akwa, usne ussa puinta puintɨtkanain kanpara. Pilatone Joséra ɨninta, Jesústa mu kihshanapa. Joséne ɨt kit mamazkasa Jesústa muara.
39Nicodemokas, an ñamin maza amta Jesústa paran ɨtmikakas, treinta kilowa piam pihshkasa ara. Mirrakas áloekas karat.
40Suasne Josékas Nicodemokas Jesústa mut kit pĩnkasa wat piam narɨt pihshkasa ippailta. Judío awane sunkanain irɨttuza watsat kamanapa kiamɨzta.
41Jesústa kurishta patpiantɨt tukin, warɨt su kashakin azi. An sukinne masas uk kul sarɨt. Sun uk kulta mɨnminkas iramikara tarachi. Sɨnam.
42Uspane Jesústa sun kasha uk kulta nukpailta, Judío awawa kwaizkulmu payura taiznapain akwa.

Read San Juan 19San Juan 19
Compare San Juan 19:10-42San Juan 19:10-42