SAN JUAN 19:1-38

¹ꞌBa ꞌbatsaꞌen Pilato ꞌexa nga sꞌe̱re Jesús.

²ꞌBa chasoldadu kitsinda jngu corona naꞌya ꞌba ꞌesun nindaku, ꞌba kitsikaja jngu najñu nduju kuán joni xi baja rey.

³ꞌBa ꞌbatsaꞌen inyatsitiñatꞌare ꞌba inyatsure: —¡Teꞌndari, reyre xuta judío! ꞌBa inyamoꞌotꞌa tsare.

⁴ꞌBa ꞌbatsaꞌen Pilato ꞌetju ngani ngandetsian ꞌba kitsure nchjabiu: —Ngaꞌe kꞌuaxje_nuu̱ xutabiu, tuxi xiañu nga tumé je tisakuna̱ ngatꞌare kui.

⁵ꞌBa ꞌbatsaꞌen Jesús ꞌetju ngandetsian nga tjiꞌsunre corona xi naꞌya ꞌba yaja najñu nduju kuon. ꞌBa Pilato kitsu: —¡Ngaꞌe sejña xutabiu!

⁶ꞌBa kionga xi ngakure naꞌmi ko nchja xi tsikuenda ningu tsabe Jesús, kiskiꞌndaya: —¡Tjatꞌai kru xutabiu! ¡Tjatꞌai kru kui! ꞌBa Pilato kitsure: —Tusa jun tangiko ꞌba tetꞌo kru, ngatꞌa an tumé je tisakuna̱ ngatꞌare kui.

⁷ꞌBa xuta judío kitsu ngani: —Tjin=ni̱ kjuatexuma, ꞌba jotsaꞌen tijña kjuatexumani̱ ꞌba=tsaꞌen tjinnere nga kueya xutabi, ngatꞌa Kiꞌndire Naꞌenchana titsaꞌen yojore.

⁸Kionga Pilato kjintꞌe kibiu, ngisa ꞌñu kitsakjun.

⁹ꞌBa ꞌbatsaꞌen jaꞌasꞌen ngani niꞌya pretorio ꞌba kitsure Jesús: —¿Ñá=ñu tsiji? Tunga Jesús bi kitsingojore.

¹⁰ꞌBa ꞌbatsaꞌen Pilato kitsu nganire: —¿A bi xukonaa̱? ¿A bi ꞌye nga ku̱anna̱ kuetꞌara̱ kru asa sikꞌejñandaira̱?

¹¹ꞌBa Jesús kitsingojore: —Nime ma ñeꞌen ngatꞌana̱ tsa bi Naꞌenchana kitsjaꞌnderi. Kui kjuañu, xi kitsingantsjana̱ ngatꞌari ngisa= ꞌñu tse je tjinre nga ko mare ji.

¹²Tsakaꞌanire chubabiu Pilato ꞌetutsꞌinre nga tsangisjai ndiya jótsaꞌen ku̱an sikꞌejñandai Jesús. Tunga xuta judío kiskiꞌndaya: —¡Tsa sikꞌejñandai xutabiu, bi nda teñeꞌen ngixkun xuta titjun César! ¡Xi rey tsaꞌen tajngu yojore, kui= xi stike xuta titjun César!

¹³ꞌBa kionga Pilato kjintꞌe enbi, ꞌbatsaꞌen tsꞌaxje Jesús ngandetsian ꞌba tsikꞌejña ngaꞌnde ña tsaꞌen kjua, ngaꞌnde xi “Ña kjiya ndiojo” ꞌmi, xi Gabata ꞌmi nga en hebreo.

¹⁴ꞌBa nixtjinbiu je inyaꞌbenda xuta mé= xi machjen sꞌi pascua, ngatꞌa je tifechu tiña sꞌiu. Jeru mején nyusen yaꞌa. ꞌBa Pilato kitsure xuta judío: —¡Ngaꞌe sejña reynu!

¹⁵ꞌBa nchjabiu kiskiꞌndaya: —¡Tjiꞌnaxje xutabiu! ¡Tjiꞌnaxje! ¡Tjatꞌai kru kui! ꞌBa Pilato kitsure: —¿A kuatꞌa=ña̱ kru reynu? ꞌBa xi ngakure naꞌmi kitsu: —¡Tsajain ngisani̱ kjaꞌe rey, tu jngu sani xuta titjun César!

¹⁶ꞌBa ꞌbatsaꞌen Pilato kitsingantsja Jesús, tuxi sꞌe̱tꞌani kru, ꞌba nchjabiu kiko.

¹⁷ꞌBa ꞌbatsaꞌen Jesús ꞌetju nga yaꞌanijin krure nga kiji ngaꞌnde xi ngaꞌndere nindaku mikꞌen ꞌmi (xi Gólgota ꞌmi nga en hebreo).

¹⁸Kio kisetꞌa kru kui ko kjaꞌe ngisa jó nchja. Jngu xi kisetꞌa kru ngate kixire ꞌba jngu ngate skjunre.

¹⁹ꞌBa ꞌbatsaꞌen Pilato ꞌexa nga se̱tꞌa jngu yate ngasunnkꞌa ku Jesús. Xi ꞌbitsaꞌen kuaꞌindutꞌa: “Jesús xi Nazaret tseꞌe, reyre xuta judío.”

²⁰ꞌBa nkjin xuta judío ꞌexkiya kibiu, ngatꞌa tiñare naxinando ngaꞌnde ña kisetꞌa kru Jesús ꞌba ngatꞌa yatebiu kuaꞌindutꞌa en hebreo ko en latín ꞌba ko en griego.

²¹ꞌBa ꞌbatsaꞌen xi ngakure naꞌmire xuta judío jaꞌekun Pilato ꞌba kitsure: —Bi nda tjin nga: “Reyre xuta judío”, kuaꞌindutꞌa yatebiu. Tusa tjatꞌai nga: “Kui xi kitsu: An= ña̱ reyre xuta judío.”

²²ꞌBa Pilato kitsingojore: —En xi je kitsiꞌindutꞌaa̱, je kitsiꞌindutꞌaa̱.

²³ꞌBa kionga je chasoldadu je yatꞌa kru Jesús, ꞌbatsaꞌen kiskjebe najñu xi yaja ꞌba ñujun kaꞌa tsꞌaxje. ꞌBa jngu kaꞌa tsꞌakore nga jngu jngu chasoldadu. ꞌBa nde kiskjebe najñu nduju xi yaja Jesús xi bi kitjuya, tu jngu kaꞌa sani ngisin kaꞌnda ngiꞌndere.

²⁴ꞌBa kitsure xinkjin: —Bi kꞌuejnda kibi. Tusa siskayaña ꞌyá xi kꞌuakore. ꞌBa kuán tuxi ꞌetjusunni enre Naꞌenchana ña ꞌbatsaꞌen kuaꞌindutꞌa: “Kitsikaꞌbire xinkjin najñuna̱ ꞌba kitsiskaya najñu ndujuna̱.” ꞌBa ꞌba= kitsaꞌen chasoldadu.

²⁵ꞌBa tsikinyatꞌa tiña krure Jesús nare ko ndichja nare ꞌba ko María xi chjunre Cleofas ꞌba ko María Magdalena.

²⁶ꞌBa kionga Jesús tsabe nare ko xutare xi ꞌñu tsimején nga kio sejñatꞌare, kitsure nare: —Na, kiꞌndiri sejña kio.

²⁷ꞌBa kitsure xutare: —Nari sꞌejña kio. ꞌBa ndekuini chubabiu xutare kiskjebetjo nare Jesús ndaba.

²⁸Kionga je kuán kibi, Jesús be nga je kuajngu ngayéje xi tjinnere nga kꞌuetjusun ꞌba kitsu: —Xindana̱ ꞌBa kitsu, tuxi ꞌetjusunni jotsaꞌen kuaꞌindutꞌa enre Naꞌenchana.

²⁹ꞌBa kio tijña jngu nisa xi inya binu san. ꞌBa nchjabiu kitsikaꞌnyi jngu tsanga ko binu son ꞌba ꞌeku jngu yare hisopo ꞌba kitsitiñatꞌare tsꞌa Jesús.

³⁰ꞌBa kionga je kitsꞌi binu son kitsu: —Je= ꞌetjusun yeje. ꞌBa ꞌbatsaꞌen yejen tsindi nindaku ꞌba kꞌen.

³¹ꞌBa kui nixtjinbiu tisꞌenda xichine xi tseꞌe nixtjin nga nikjaꞌaya. ꞌBa xuta judío bi mejénre nga yojore janda sꞌetjen ꞌbangi tꞌa kru kionga kjuaꞌe nixtjin nga nikjaꞌaya, ngatꞌa ꞌñu kun kui nixtjinbiu. Kui kjuañu tsiꞌanire Pilato nga xutꞌokja ngasure nchja xi tjindutꞌa kru ꞌba nga xjaꞌaxin yojore.

³²ꞌBa ꞌbatsaꞌen jaꞌe chasoldadu ꞌba kiskjetꞌokja ngasure ngojó nchja xi kjiyutꞌako kru Jesús.

³³Tunga kionga echu ña kjitꞌa Jesús, tsabe nga je kꞌen. Kui kjuañu bi kiskjetꞌokjani ngasure.

³⁴Tunga jngu chasoldadu juñare lanza nisinre Jesús, ꞌba taꞌa ꞌetju jin ko nanda.

³⁵ꞌBa xuta xi tsabe mé= xi kuán, kui= xi beꞌenijmi ꞌba xi tsu kui kjuakixi=. ꞌBa be= nga kjuakixi mé= xi titsu, tuxi ꞌba nde ku̱akjainninu jun ngayeje.

³⁶Ngatꞌa ꞌba kuán tuxi ꞌetjusunni enre Naꞌenchana ña ꞌbatsaꞌen kuaꞌindutꞌa: “Nijngu nindare stjutꞌo.”

³⁷ꞌBa nde tsaꞌen kuaꞌindutꞌa enre Naꞌenchana ña ꞌba tsu: “Nchjabiu skutsejenꞌa xuta xi juñare.”

³⁸ꞌBa jaskan kionga je ꞌba kuán, Kuse xi Arimatea tseꞌe, xi ꞌba nde xutare Jesús xi tsakꞌajmetjenngiꞌmo ngatꞌa tsankjunke xuta judío, kui xi tsiꞌare Pilato nga sjaꞌndere nga kueko yojore Jesús. ꞌBa ꞌbatsaꞌen Pilato kitsjaꞌndere, ꞌba xutabiu kikjaꞌa yojore Jesús ꞌba kiko.