San Juan 19:1-19

¹Niꞌr bchëꞌë Jesús Pilato, len benëꞌ ga gulaguinëꞌ Lëꞌ bönniꞌ rjaquëꞌ gdil‑l.

²Glunëꞌ tu breguiꞌ zxuzaꞌ nëꞌi yötsiꞌ bönniꞌ rjaquëꞌ gdil‑l, atiꞌ guludxíëꞌ lei icjëꞌ Jesús, len gulugacuëꞌ Lëꞌ tu lariꞌ tunn xna ca nac le tacuëꞌ bönniꞌ taꞌná bëꞌë.

³Niꞌr gulabiguëꞌë lahuëꞌ Jesús, len tëꞌ Lëꞌ: ―Bicaꞌ bauꞌ Liꞌ, Bönniꞌ Rna Béꞌinëꞌ Bunách Judío. Niꞌr gulagapëꞌë lau ruꞌë.

⁴Niꞌr burujëꞌ leyúbl Pilato, len rëꞌ yuguꞌ bönniꞌ judío uná bëꞌ, rnëꞌ: ―Gul‑yú, ubijaꞌ‑nëꞌ lauliꞌ ni quië gnö́ziliꞌ nitú le nac döꞌ cutu rudzöldaꞌ nuꞌë bönniꞌ ni.

⁵Niꞌr brujëꞌ Jesús, dxia icjëꞌ breguiꞌ zxuzaꞌ nëꞌi yötsiꞌ naꞌ len nacuëꞌ lariꞌ tunn xna naꞌ. Pilato rëꞌ lequëꞌ: ―Ni zoëꞌ bönniꞌ ni.

⁶Catiꞌ gulaléꞌinëꞌ Jesús yuguꞌ bxuz uná bëꞌ len yuguꞌ bönniꞌ niꞌa naꞌquëꞌ, zidzj gluꞌë didzaꞌ, taꞌnë́ꞌ: ―Bdëꞌë lëꞌi yag cruz. Bdëꞌë lëꞌi yag cruz. Pilato rëꞌ lequëꞌ: ―Lbiꞌiczliꞌ gul‑chë́ꞌë len gul‑tsajdë́ꞌë lëꞌi yag cruz. Nedaꞌ cutu bi döꞌ budzöldaꞌ nuꞌë bönniꞌ ni.

⁷Niꞌr bönniꞌ judío naꞌ tëꞌ lëꞌ: ―Dë queëtuꞌ tu zxba, len rna bëꞌ zxba queëtuꞌ naꞌ ral‑laꞌ gatiëꞌ bönniꞌ ni le gnëꞌ naquëꞌ Zxiꞌnëꞌ Dios.

⁸Catiꞌ byönnëꞌ didzaꞌ ni Pilato, gudxrnëꞌ.

⁹Leyúbl buaziëꞌ yúlahuiꞌ naꞌ, len rëꞌ Jesús: ―¿Gazxtë bönniꞌ Liꞌ? Cutu bi didzaꞌ bubiꞌë Jesús.

¹⁰Niꞌr Pilato rëꞌ Lëꞌ: ―¿Naruꞌ cu ubiꞌitsuꞌ didzaꞌ, quíxjöiꞌnuꞌ nedaꞌ? ¿Naruꞌ cu nöznuꞌ dë lu naꞌa udáꞌa Liꞌ lëꞌi yag cruz, len dë lu naꞌa usanaꞌ Liꞌ?

¹¹Bubiꞌë didzaꞌ Jesús, rëꞌ lëꞌ: ―Cutu bi dë lu naꞌu gunuꞌ quiaꞌ laꞌnaruꞌ cu nudödëꞌ lu naꞌu yöl‑laꞌ uná bëꞌ naꞌ Dios. Qui lë ni naꞌ, bönniꞌ naꞌ budödëꞌ nedaꞌ lu naꞌu nabágaꞌrëꞌ zxguiaꞌ ca liꞌ.

¹²Laꞌ niꞌz rzu rböꞌë Pilato usanëꞌ Jesús, san gluꞌë zidzj didzaꞌ bönniꞌ judío uná bëꞌ, taꞌnë́ꞌ: ―Chquiꞌ usanuꞌ‑nëꞌ bönniꞌ ni, cutu rdzaguꞌ‑nëꞌ dxiꞌa César, bönniꞌ rna béꞌinëꞌ gdutë yödzlyú. Nu bönniꞌ run cuinëꞌ bönniꞌ rna bëꞌë, rdáꞌbaguëꞌë César naꞌ.

¹³Catiꞌ byönnëꞌ didzaꞌ ni Pilato, gna béꞌinëꞌ nup tsajxiꞌgac Jesús, atiꞌ gröꞌë xlatjëꞌ ga rbequi xbeynëꞌ, latj naꞌ nazíꞌ lei Löꞌa Ga Zxoagac Guiöj Blag, len ca nac didzaꞌ hebreo nazíꞌ lei Gabata.

¹⁴Laꞌ dza naꞌz nac dza ziꞌa gdxin Lni Pascua, len nac gdu huagbídz. Niꞌr gudxëꞌ yuguꞌ bönniꞌ judío uná bëꞌ naꞌ Pilato, rnëꞌ: ―Ni zoëꞌ bönniꞌ rna béꞌinëꞌ lbiꞌiliꞌ.

¹⁵Gluꞌë zidzj didzaꞌ, taꞌnë́ꞌ: ―Bëtiëꞌ, bëtiëꞌ. Bdëꞌë lëꞌi yag cruz. Pilato rëꞌ lequëꞌ: ―¿Rnábitsaliꞌ nedaꞌ udáꞌa‑nëꞌ lëꞌi yag cruz bönniꞌ rna béꞌinëꞌ lbiꞌiliꞌ? Gulubiꞌë didzaꞌ bxuz uná bëꞌ, taꞌnë́ꞌ: ―Nutur nu zoa rna beꞌi netuꞌ. Tuzëꞌ César rna béꞌinëꞌ netuꞌ.

¹⁶Qui lë ni naꞌ budödëꞌ Jesús lu naꞌquëꞌ Pilato, quië tsajdaꞌquëꞌ Lëꞌ lëꞌi yag cruz. Niꞌr gulaguel‑lëꞌë Jesús, len gulachë́ꞌë Lëꞌ niꞌl.

¹⁷Brujëꞌ niꞌ Jesús, nuꞌë yag cruz queëꞌ, zijëꞌ latj nazíꞌ lei Latj Qui Bögaꞌ Icjruꞌ, len ca nac didzaꞌ hebreo nazíꞌ lei Gólgota.

¹⁸Niꞌ guludë́ꞌë Jesús lëꞌi yag cruz, atiꞌ guludáꞌlenëꞌ Lëꞌ tsazxö́n lë́ꞌigac yag cruz yechopëꞌ bönniꞌ. Tslaꞌa hueaj taꞌdë́ꞌë, atiꞌ Jesús dëꞌë gatsj lahuiꞌl chopëꞌ bönniꞌ naꞌ.

¹⁹Bsölëꞌë Pilato bönniꞌ buzujëꞌ lu guich tu didzaꞌ le buzóëꞌ lëꞌi yag cruz icjlëꞌ Jesús, le rna cni: “Jesús, Bönniꞌ Nazaret, Bönniꞌ Rna Béꞌinëꞌ Bönniꞌ Judío.”