SAN JUAN 19:1-17

¹Chashna chay chiknik runakuna willaptinkuna Pilatoka soldadunkunata willarkansapa Jesusta makanankunapa.

²Paykunaka Jesusta makashkankunawasha kasha likidu waskamanta suk koronata rurashpankuna umanpi churapurkansapa asichinankunapa. Kamachikukpa sani llachapata mudachirkansapa.

³Chaymanta ladunchashpankuna uyanpi sukaman sakmashpa asichishpa willarkansapa: —¡Judiyu runakunapa kamachikuknin kaptiki sukaman munaykisapa!

⁴Chaymanta Pilato kashkan washaman llukshishpa chay runakunataka willarkansapa: —Mash allita uyariwaychi. Kunanka kay runataka pushamuni yachanaykichipa mana nima uchallikushkanta tarishkaynita.

⁵Chaypina Jesuska kashamanta ruradu koronayuk kamachikuk runapa sani llachapa churakudu llukshimurkan. Chashna llukshiptin Pilatoka chay runakunataka willarkansapa: —¡Kawaychina kay runataka!

⁶Chaypina saserdotekunapa awtoridarninkunawan Tata Diospa wasin kuydakkuna sinchita rimashpa willarkansapa: —¡Suk kruspi chakatachiy! ¡Suk kruspi chakatachiy! Chaypina Pilatoka willarkansapa: —Kankunaka pushaychi suk kruspi chakatashpa wañuchinaykichipa. Ñukaka mana nima uchanta paypika tarinichu.

⁷Chaypina chay runakunaka Pilatota aynirkansapa: —Tata Dios killkadunpi willawansapa kay laya runata wañuchinaynikunapa. Payka llullakushpa rimashka Tata Diospa chaylla wambran kananta. Chayrayku wañunan tiyan.

⁸Pilatoka chay runakuna rimashkankunata uyarishpa ashwanta manchakurkan.

⁹Chaymanta kamachikunan wasiman Jesusta kashkan yaykuchishpa tapurkan: —¿Maymantati shamushkanki? Chashna Pilato tapuptinna Jesuska mana nimata aynirkanchu.

¹⁰Upallalla kaptin Pilatoka willarkan: —¿Manachu nimata ayniwanki? Ñuka munashpayni suk kruspi wañuchichiykiman. Munashpayni kachariykiman. ¿Manachu chaytaka yachanki?

¹¹Chashna willaptinna Jesuska Pilatota willarkan: —Tata Dios mana munaptinka mana nimata atipankimanchu rurawayta. Kayfas sinchi kamachikuk saserdote kaykashpa kanman pushachimuwashka wañuchichiwanaykipa. Chayrayku payka kanmanta ashwan uchayuk.

¹²Chay ratumantapacha Pilatoka sukaman munarkan Jesusta kachariyta. Chaypina Jesusta chiknik runakuna ashwanta kaparikushpa Pilatota willarkansapa: —Kay runaka rimashka sinchi kamachikuk kananta. Chayta rimashpa rimaykan manana ashwan sinchi kamachikuk Sesarta kasunanta. Kay runata kacharishpaykika kanpish mananami chay kamachikuk Sesarta kasunkinachu.

¹³Chayta uyarishpa Pilatoka Jesusta kashkan pushachirkan chay runakunapa ñawpakninkunaman. Chaypina kamachikunan sillanpi tiyarirkan chay runakunata kamachinanpa. Chay silla Gabata pampapi karkan. Chay Gabata shuti hebreo rimanapi riman Rumimanta Ruradu.

¹⁴Paskua fiesta suk diyallana illarkan. Chay diya yakallapa chawpi diyata Pilatoka chay runakunataka willarkansapa: —Mash kawaychi kamachishuknikichita.

¹⁵Chashna Pilato willaptinkunana tukuy paykunaka sinchita rimarkansapa: —¡Wañuchun wañuchun! ¡Suk kruspi chakatachiy! Chaypina Pilatoka tapurkansapa: —¿Sinchi kamachishuknikichi runatachu wañuchichisha? Chaypina saserdotekunapa kamachikukninkunaka Pilatota willarkansapa: —Alli kamachikuk Sesarllami ñukaykunata kamachiwansapa.

¹⁶Chashna willaptinkuna Pilatoka willarkansapa Jesusta suk kruspi wañuchinankunapa. Chaypina soldadukuna pusharkansapa.

¹⁷Chaymanta soldadukuna Jesusta krusninta aparichishpa suk lomaman pusharkansapa. Chay lomaka iden uma poto rikurirkan. Chayrayku shutinka karkan Uma Poto. Judiyukunapa rimanaynikunapi chay lomapa shutin karkan Golgota.