SAN JUAN 11:25-48

²⁵Jesús quilic: —Nehual in inminlayuliltilisli in mijquimes, nehual in yulilisli. Nehual pan nopampa huil nicyuliltía aqui yes huan quiman yes nicnequi, pampa nicpía yulilisli calica nilayuliltía. Aqui nechneltoca, mas que miquis, ma yoje yihual yulis.

²⁶Huan aqui yes yuli nechneltocatica, yihual amo quiman miquis pa moxilus ilaixpan Dios. ¿Ticneltoca inon hual nimitzilijtica?

²⁷Marta quinanquilic: —Jo quema, Tata, nehual nicneltoca quinami tehual tiunca in Cristo, tiunca iXolol Dios hual ticchialoaya pa hualas pin lalticpan.

²⁸Huan quiman quilic inon, mohuicac, uyac quinotzac ixtacayito icni María, quilic: —Axan unca in Lamaxtini huan mitznoztica.

²⁹Huan quicaquic inon María, moqueztiquisac, uyac capa Jesús.

³⁰Axan ayamo calaquic Jesús pin caltilan, ayamo mijcuanic capa Marta quinamiquic.

³¹Pin cali cataloaya ca María sequin huejueyenten judíos hual quilacahualtitataloaya. Cuaquinon, quitaje moqueztiquisac huan quisac. Yehuanten quitocaje, quijtutataloaya yihual yahuiaya pa in cueva (ostul) capa quilalije in mijquil. Quijtuloaya yahuiaya quichoquili umpa.

³²Yoje, ajsic capa cataya Jesús quimolancuacuetzilijtiquisac, quilijtica: —Tata, sinda tehual ticataya nican, nocni amo miquiaya.

³³Huan Jesús quitaya chocatataya huan quinmitaya in judíos hual hualaloaya ca yihual María, yehuanten noje chocatataloaya. Cuaquín quicocuc iyolo huan laijtic yihual motoliniaya.

³⁴Quinmilic: —¿Capa anquilalic? Quinmilije: —Xihuala huan xiquita.

³⁵Chocac Jesús.

³⁶Cuaquín moilije in judíos: —Xiquitacan quinami yihual quinequic.

³⁷Huan sequin ca yehuanten quilije: —In lacal quilachialtic se pachacal. ¿Leca amo huil quitzacuilic pa camo miquisquiaya in lacal?

³⁸Huan Jesús iyolo quicocujtataya ca icnotilisli, ijyulantic laijtic yihual quiman ajsiaya capa quilalije. Cataya se cueva (ostul) huan se tel quilalilije inahuac pa quitzacuas.

³⁹Quinmilic: —Xiquijcuanican in tel. Marta icni in mijquil quilic: —Tata, axan quisas ijyul. Quipía nahui tonalijmes quiman polehuic.

⁴⁰Jesús quilic: —Nimitzilic sinda ticneltocas, tiquitas quinami unca hué Dios ilahueliltilisli. ¿Amo tiquijnamiquía?

⁴¹Cuaquín quijcuanije in tel. Huan Jesús lachíac pa in cielo (ilhuicac) huan quilic: —Tata, nimijsehuía pampa tichcaquic.

⁴²Huan nicmati tehual amo quiman timocahua pa tichcaquis. Ma yoje, nimitzilic inon pampa yehuanten in míac moquezticate notenco, huan yoje quineltocasi tehual tichtilanic nican pan lalticpan.

⁴³Huan quiman lamic lajtuc yoje, tzajtzic ca lajtol chicahuac, quilic: —¡Lázaro, xihuala pa quiahuac!

⁴⁴Huan hualac pa quiahuac Lázaro, yihual hual cataya mijquil, ilpitataya ca in tzotzomajli calica quiliarulo in mijquimes, huan pa iixco ilpitataya oc se tzotzomajli. Jesús quinmilic: —Xictomilican pa huil yas.

⁴⁵Yoje, míac ca innojen huejueyenten judíos pehuaje quineltocaje Jesús unca in Cristo, pampa nepa ca María cataloaya huan quitaje in hual quichíac Jesús.

⁴⁶Ma yoje, sequin ca yehuanten uyaje capa in fariseos, quinpuhuilije inon hual Jesús lamic quichíac.

⁴⁷Pampín, lanahuatije in tiopistas huejué huan in fariseos pa monechicusi moxtin yehuanten, moilije: ¿Len tialo ticchihualo? Pampa in lacal quinchía míac hual quinmahuisultilo ca lamajtilisli moxtin.

⁴⁸Sinda ticmacahuiltilo pa yahuis yoje, moxtin quineltocasi yihual unca in Cristo. Cuaquín hualasi in romanos huan techquixtilisi tolahueliltilisli huan tolali.