SAN JUAN 11:12-29

¹²Cuaquín imonextilinijmes quilije: —Tata, sinda coxtica, cuaquín pajtis.

¹³Jesús quinequiaya quijtu pampa miquic Lázaro. Huan quijtuje imonextilinijmes pampa yihual quinlaquetziliaya quinami cochiaya.

¹⁴Pampín, quinmilic Jesús ca lajtol calica amo moixpolulosquiaya: —Lázaro miquic.

¹⁵Huan unca paquilisli pa noyolo pampa amo nicataya nepa, pampa yoje cataya cuali pa amhuanten. Pampa inon, anyahui anquilalía míac laneltocalisli ca nehual. Ma yoje, ma tiacan capa yihual.

¹⁶Cuaquinon Tomás hual noje itocaya Seinomenten quinmilic in oc sequin monextilinijmes, quinmilic: —Ma tiacan noje ca yihual, pa yoje timiquisi ca yihual.

¹⁷Yoje, ajsiaya Jesús, quilije quinami axan quinpiaya nahui tonalijmes hual Lázaro cataya pin cueva (ostul) capa quilalpachuje.

¹⁸Betania huan Jerusalén amo cate huejca se ca in oc se, quinami cinco (macuili) kilometros.

¹⁹Huan míac ca in huejueyenten judíos hualaje ca Marta huan María pa quinlacahualtilisi inmicni Lázaro.

²⁰Huan quiman quimatic Marta pampa ajsitihualaya Jesús, uyac quinamiquic. Ma yoje, mocahuac María molalijtataya pin cali.

²¹Huan Marta quilic Jesús: —Tata, amo miquiaya nocni sinda ticataya nican.

²²Ma yoje, axan nicmati len yes ticlajlanis Dios, yihual mitzmacas.

²³Jesús quilic: —Mocni yulis oc sejpa.

²⁴Marta quilic: —Nicmati yihual yulis oc sejpa pan tonali quiman lamis in lalticpan hual axan unca. Yulis nepa ca moxtin hual yulisi oc sejpa.

²⁵Jesús quilic: —Nehual in inminlayuliltilisli in mijquimes, nehual in yulilisli. Nehual pan nopampa huil nicyuliltía aqui yes huan quiman yes nicnequi, pampa nicpía yulilisli calica nilayuliltía. Aqui nechneltoca, mas que miquis, ma yoje yihual yulis.

²⁶Huan aqui yes yuli nechneltocatica, yihual amo quiman miquis pa moxilus ilaixpan Dios. ¿Ticneltoca inon hual nimitzilijtica?

²⁷Marta quinanquilic: —Jo quema, Tata, nehual nicneltoca quinami tehual tiunca in Cristo, tiunca iXolol Dios hual ticchialoaya pa hualas pin lalticpan.

²⁸Huan quiman quilic inon, mohuicac, uyac quinotzac ixtacayito icni María, quilic: —Axan unca in Lamaxtini huan mitznoztica.

²⁹Huan quicaquic inon María, moqueztiquisac, uyac capa Jesús.