Samu 73:4-28

⁴Nakamana randa pingi mende epa napyamopa nakama poraiyuo yanenge keyange karo karaminyi.

⁵Nakama wakale dupwa pilyaminyi doko suu pyaoranda nyii nalyaminyi. Wakale dupwa randa wakale wakale nyiminyi dopale doko nakama keta epa nalyamoko.

⁶Dopa pipyasa nakama mee yongona andanyi nembo kyaŋe silyaminyi. Dopa pyuo karo akali menge dupwa pyapala kokwa sinyi nembo karaminyi.

⁷Nakamana mona dupwana yulu koo wakale wakale dupwa neta epenge. Dee nakamana suu pingi dupwana yulu koo dupwa imambu see nao rapa rapa pilyaminyi.

⁸Nakamame wakale dupwa kando pii koo lao giyalya giyana pilyaminyi. Nakama range mupwa lao suu pyapala enda akalipi wakale dupwa randa maiyuo kokwa seraminyi dokona lao suu pyao lao palaminyi.

⁹Nakamame yake dorena karenge Anatu baakando pii kopetame letaminyi. Nakama rangena kingi doko ketae pyambuo lao isa wambu dupwa dopa pinya dopa pinya lao karaminyi.

¹⁰Dopa piminyisa Anatunya wambu angi dupwamepe kapu kyepala nakamana pii laminyi doko soo kale yukupala angi lao suu pilyaminyi.

¹¹Namwa pilyamano dupwa Anatumi see nara, letaminyi. Kamongo Ama Ketae karenge dokome koto kanda nara, letaminyi.

¹²Wambu koo pingi dupwana yulu doko dopa pyuo pilyaminyi. Nakama bange ama malu sipyamopape mee nyelanako suu pyao lao karaminyi.

¹³Namba mondo lao waso karo mona yapasi silyamo dee nambana kingi dokome koo mende pii nalyo. Doko mee ingyuo parase?

¹⁴Anatu, embame kukwa korakamape yuu gii yaka lao namba randa jookarenge. Dee yangama peparae namba moŋo jingi.

¹⁵Namba pii kopetame leyaminyi doko lapuli embena wambu pii lao nenge rambo lao pingi dopale pii napuli.

¹⁶Dokona lao renge angi dokona randa nao serama ingyapyamopape sipuli lao pyuo lisa pyuo karapu.

¹⁷Dopa pipunupape namba embena tembole anda dokona papala koo pingi dupwa keta renge dopa pyuonde paliralyamo lao soo pakana palyipu.

¹⁸Kinyi, embame nakama kata keta keta pyuo puu pelyamo dokona nyuo karapala pyao lukundo soo randa nyinya lao piri ingilyamo.

¹⁹Nakama waiya lao koo keta palyuo randa nao otarami.

²⁰Kamongo nakama mee kukwama kombeya pipala yangama sipurenge dokopa mee ingyalya ingyana pilyasa kame soo kaenge dopakale ingyuo karaminyi.

²¹Dokopa nambana suu pingi koo manjo mona rando karo

²²namba kopyali ingyapala emba angi sepa nayo. Namba rangeme embena lenge kambu dokona suwa menape ingyuo peyo.

²³Dopa pipunupape namba embapa role pyao karapunu dokona lao embame nambana kingi minyaro karene.

²⁴Embame dopa pyuo dapa pyuo karape lao namba kata lasaka pipinyi karo pelyo. Pao lumwa pyuo dusa nambana kingi ketae pyambuo lakando nyere ingilyamo.

²⁵Yake panda dokona api mende nambana lao karase? Embakoiki ingilyamo. Isa yuu dakena namba karapunu dokopa embapako angingyuo karo.

²⁶Nambana suu pingipi dee yongope poraya nara ramo dokopa Anatu doko nambana porainya renge ingilyamo. Anatu nambapa kararamo dokopa namba sikya pirasa pira. Mendeme yangyuo yano piramo kararonde daalamo.

²⁷Kinyi, enda akalipi emba yaki nyeraminyi dupwa kumuo parami ingyaramopa lapome embapa mondo lao au pyuo kara naraminyi dupwa embamekokwa sinyi nembo karare.

²⁸Dopa pyuo karena lao namba range doko Anatu embapa lungwa lungwa pyuo kararo doko keyange lao soo nyuo karo. Kamongo Mupwa Andake Wakasa namba kyawa minyaramopa banya yulu pilyamo dupwa polo lao kararo.