Samu 37:2-26

²Nakama rambi isokope mee yando nao isa pamuli pyuo waiya lao isa parami ingilyamo.

³Kamongo keta pyamalyuo karapala wambu dupwa pipya yulu mondo lao pyuo karare. Dopa piri ramo dokopa embena yuu dokona koo keta pali nao mee palyuo karare.

⁴Emba rae mairinyi renge doko Kamongo keta koto karare. Dokopa embena monarena suu pilinyili pyuo jeramo karare.

⁵Emba Kamongo kumuo maipala baa keta pyamalyuo karare dokopa baame emba nyisara.

⁶Baame embena yulu rolae dupwa nyepala korakama neta renge dopale ingyuo rao eŋa nembakaramo karare.

⁷Koo dupwana dopa pirama lao wambu koo dupwame angingyuo lao rapa rapa yulu pyuo pirami dupwana mona nemba napala Kamongona lenge kambudokona mona sinya lao baame panda nyuo wambo pinya lao male soo karare.

⁸Imbwa kaeyape dee pyalana suu pyaa napipi. Mona nembo katakaeyare renge dopaleme emba nyisa nange.

⁹Kamongo keta pyamalyuokararami dupwa yuu range dokona nao paliraminyipa koo pirami dupwa neta nembarami ingilyamo.

¹⁰Koo pyuo kararami dupwa dusa kata serandena pana narami ingilyamo. Kararaminyi kandalana piri doko kanda nareingilyamo.

¹¹Range pau lasi ingyuo kararami dupwa yuu dokona nakama kapa palyuo mona seramopa nao kararami.

¹²Akali koo pingi dokome akali keyange pingi kando pyalana suu pingi. Suu pyapalalenge polo epe kanda nao karenge.

¹³Dopa piramopape Kamongome akali koo pingi dupwa kando repe koo keta palyaminyi lapala giyalya giyana pyuo karenge.

¹⁴Akali koo pingi dupwame nakamana wua gela dupwa nyuo wakyuo nakamana yanda dupwa ipyapala wambu pendewa dupwa pyalana lao karaminyi. Dopako pyuo akali keyange pingi dupwa opetaeko pyao kumakalana pilyaminyi.

¹⁵Dopa piraminyipape nakamana wua gela dokome nakama range naramopa yanda dupwa mee punju para.

¹⁶Akali keyange pingi dokona bange kuki serara dupwame akali koo pingi dupwana bange malu seraraminyi dupwa isa palyuo sera ingilyamo.

¹⁷Kamongome koo pingi dupwana porai renge doko pyao bembai lanyi nembapala yulu keyange pingi dupwa yapo kame pyuo minyakamira.

¹⁸Banya letamuli pyuo warombo soo pii minyingi dupwa baame mondo lao rapu pyuo kararamopa yuu doko nakamana ingyalu ingyuo ingyara.

¹⁹Nakama randa eparamo dokopa moŋo nyii narami. Lopo seramo dokopa nakama nenge kapa seramopa koo keta pali narami.

²⁰Koo pyuo karenge dupwa kumarami ingilyamo. Kamongo nyisu petenge wambu dupwa mee isa jingi rele lao kalya pipala mee ingyuo pao yangama yangama kopana mendeke ingyuo meeingyuo parami ingilyamo.

²¹Wambu kopetame pingi dupwana yulu doko bange saka napala mee yari ingyuo kee lao nyepala dee range maiyakami nange. Dopa piramopape akali keyange dokome bange mee mairamo doko ketae reto maiyuo maiyuo karara.

²²Kamongo baame rae maiyuo elyape keta petenge wambu dupwa yuu dokona kapa palirami. Dopa piramopape Kamongome rae mai nara wambu dupwa yuu dokona ralinyi nembara ingilyamo.

²³Kamongome akali baa apa pyuo karara kata dokona lanyuo penge. Dopa pyuo baa rae mainyi pyambuo pingi wambu dupwa kyawa minyuo karenge.

²⁴Isa penge ramo dokopa Kamongome nyisilyasa isa puu pao paa nange.

²⁵Namba yuu gii malu nembo kareyo doko dakepa emo kaelyo. Dopa pipunupape akali keyange mende Kamongome kyawa yaki nyiyamo kanda nayo. Dopako pyuo banya wane wanakepeme nenge jinya lao kongo pyuo kareyaminyi kanda nayo.

²⁶Yuu peparae baame pakiki maiyuo dee yano reto maiyuoko pingi. Dopa pilyamopa banya wane wanakepe dupwa baa rae mainyi pyambungi.