Samu 22:12-31

¹²Nyisu petenge akali malu mee mena bulamakao kalyuwa dopale ingyuo karapala namba nyuo sukusa pyambwasi karaminyi karo. Yuu Besane bulamakao kalyuwa wambu pingi karenge dopale karaminyi.

¹³Nakama mena laene ingyuo nenge kata ŋaa lapala gasimwa poko namba gala lapala pyao nao pilyinyi nembalana pyuo karaminyi.

¹⁴Dopa piminyi dokopa nambana porainya renge doko pao otelyamo. Ipwayuunya kulimbuo penge dopale ingyuo pupya. Nambana kuli peparae bolombalo lapya. Nambana porainya renge doko mena kapa sungu pele letamo.

¹⁵Nambana pendoko doko yuu sinjimu yando nasi ingyuo oo lapya. Dee nambana kekenge yando napala neketaiye dokona parapya. Embame namba sinjimu dokona soo kumalale lao yaki nyuo kaeyapi.

¹⁶Akali koopingi malumi epo karo namba kako pilyaminyi. Nakamame suwa dopale ingyuowua lao namba repeta epelyaminyi. Nakamame nambana kimbupi dupwa nao rokwanyi nembelyaminyi.

¹⁷Nambana kuli dupwa peparae kapa kandarami ingilyamo. Nambana nyisu petenge dupwame namba lenge poraiyuo rapala kanda yoyo letaminyi.

¹⁸Nakamame nambana komau dupwa nyepala apimi nyera lao reto lake pyuo petaminyi.

¹⁹Nambana Kamongo, namba yaki nyepala wakale kara napipi. Embame iliki maliki laa napala aopa epo namba nenge rekya lao nyepe.

²⁰Namba wua kakupi nenge dupwana kyawa minyuo suwa dupwa keta lete nyuo pipi.

²¹Mena laene dupwame namba naa nana lao pyuo nyepe. Dee mena bulamakao kalyuwa rae lenge dupwame namba nala eparaminyi dokopa namba range kapa nyisaro ingya nalyamo.

²²Emba dopa pilinyiŋi lao nambana wambu dupwa misilarami dokopa kenane embena lao ranaisa poko pyaro ingilyamo.

²³Isaraele wambu Jekopena para pyasi Kamongona kendemande dupwa nakamame Anatunya kingi doko ketae pyambuo kingi wapambupi lakao baa lakando pisipwape.

²⁴Baame wambu pendewa dupwa yaki nyuo kaeya nange. Nakama randa nyilyaminyi dupwa kandapala meŋe lao kaengende daa. Baame nakama mata mai nange. Mata mai napala nyisinya lenge dokopa yano pyakamingi.

²⁵Mitiŋi andake lao pisirami dokopanambame embena yulu piinyi dupwana kingi lakando laro ingilyamo. Dopa pyuo wambu embapa kingi wapambupi lakao lakandelyaminyi dupwana lenge kambu dokona bange kiso jero lao lalu lao lasi dupwa kiso jero ingilyamo.

²⁶Pendewa dupwa nenge nalana suu pyarami dupwa nakonda pirami. Wambu Kamongo keta eparami dupwa baa lakandarami ingilyamo. Dopa pyuo nakama yuu dokona yulu pyuo nenge nao kapa palyuo karalu karena.

²⁷Dopa pyuo yuu muu peparaeme liti kuki mendepe neta paa nao dee kone pupuripi peparaemepe Kamongo lao suu pyao loma soo kingi wapambupi lakao misi larami ingilyamo.

²⁸Kamongo baa kiŋi ingyuo karamo dokome yuu muu dupwa iso karamo.

²⁹Moŋokyaŋe singi wambu dupwa baa mupwa lao pangu soo dee mendalipi karo kana ingyuo isa lumbi lyeraminde daa dupwa opetaeme baa keta pangu soo mona maiyuo kararami.

³⁰Rengyana ando kararaminyi dupwame banya yulu pyakamirami. Akali dupwame Kamongona lao enakana manjirami dupwa lamairami ingilyamo.

³¹Kamongome banya wambu dupwa nyiso kyawa lete nyiyaŋa lao laraminyi doko wambu ene manjipa nalyaminyi dupwa manjirami dokopa serami.