Samu 145:1-18

¹Nambana Anatu emba kiŋi ingyuokarene doko embena yulu andake dupwa nambame lao panaro. Nambame embena kingi dokona ange lao karalu kararo.

²Yuu peparae nambame ateŋa lao embapa sangyu lao kararo. Nambame embena kingi dokona lakando puu paro.

³Kamongo doko wakasa ingyuo dokome kamame ulipili lakandapengele ingilyamo. Baa mupwa wakasa ingilyamo doko mendeme kapa soonyepa nara.

⁴Embame piinyi dupwana wane manjo parami dupwame kaeya nao lao puu pao parami. Nakamame embena yulu keyange porai piinyi dupwana polo lamairami.

⁵Akalimi embena neta renge yulu wakasa dokona lao polo lamairami. Dokopa nambame embena yulu keyange dokona suu pyaokondali pyuo kararo.

⁶Akalimi embena yulu porai dupwana aromepyao laraminyipa nambame emba apa pyuo wakasa dokona polo laro ingilyamo.

⁷Nakamame embena yulu elyape pingi dokona lamaiyuo dokopa emba anjiki pingi dokona lao kenane dupwa pyarami.

⁸Kamongo doko baame mona reto sakame kumuo karenge. Waiya lao imbu singi nyii nao meemona reto puu penge.

⁹Baame wambu lapo iki angi angi lao yulu keyange pii nange. Baame wasiyamo dupwa peparae kondome kumuo nyiso karenge.

¹⁰Wasiinyi dupwa peparaeme Kamongo emba lakandarami. Dee embena wambu dupwame emba kando sangyu larami.

¹¹Embame embena kiŋi yulu neta renge dokona lao larami. Dee embena poraidokona lao laramiko.

¹²Dopa pyuo lao dokopa embena yulu andake dokope embena isingi yulu neta renge keyange wakasa dokope soo nyeramisa pira.

¹³Embena isingi yulu doko ota naramopa emba kiŋi ingyuo karo puu pare. Kamongo dokome yulu pira letamo dupwapipala kaenge. Banya yulu pilyamo dupwa peparae keyange ingingi.

¹⁴Baame randa nyerami dupwa nyiso dee isa parami dupwa nyuo minyalyuo pira.

¹⁵Wasiinyi lete karaminyi dupwame Kamongo emba iki kando karaminyi. Dee nenge yano pilyamo dokopa embame nenge maingi.

¹⁶Embame kapa naraminyili pyuo maiyuo dee nakamana yano pilyamo karenge dupwa sikya pinyi pyambungi.

¹⁷Kamongo baame yulu pilyamo dupwa rolae dokonako pingi. Baa wambunya lao sakame kumuo yulupyakamyuo karenge.

¹⁸Wambu dupwame baa keta kulisa palyuo kee letaminyi dupwa peparae keta baa repeta karamo.