Samu 119:98-108

⁹⁸Embena mawa pii doko yuu peparae namba keta silyamo dokona dokome nambana yanda pimwai pipya namba nyuo mona palenge inginyi pyambulyamo.

⁹⁹Nambame embena dopa pinya dapa pinya lao mana lenge dupwa poraiyuo suu pyao minyapu dokona mana lenge dupwa pipya mee mende ulipili ingyuo soo karo.

¹⁰⁰Nambame embena mawa pii doko kamba laa nao karapala dokome akali andapae karaminyi dupwana nambana soo nyingi renge doko andake ingyuo palipyamo karo.

¹⁰¹Emba suu pingi doo minyalana suu pyapala Satanena kata dupwa wasinyi nembo karo.

¹⁰²Emba rangeme namba mana langilini dokome embena mawa pii dupwa soo nemba nalyo.

¹⁰³Embena pii doko nakanju sipunupa amburali ipwangena rende dupwa nyuo isa palyuo silyamo.

¹⁰⁴Nambame embena lowana soo nyingi renge soo nyipundeme kata koo dupwa epe kanda nalyo.

¹⁰⁵Embena pii doko lambeme pinginyili pyuo namba kata lasaka pingi. Dopa pyuo namba pelyono dokona kendali ingyuo namba rao lanyuo penge.

¹⁰⁶Nambame embena mana pii rolae doko rape rape lao minyuo yaki nyii naroŋo lao pii lalu lao lenge ingyuo andakena palyuo lao retapunu pilyamo.

¹⁰⁷Namba kopeta kapeta randa nyilyu dokona Kamongo embame namba lete nyero lao lao kaene dokona palyuo pipi.

¹⁰⁸Nambana sangyu lao leto pii doko Kamongo embame soo nyepala embena mawa pii dokona mana langipi.