Samsi 51:1-14

¹Deiwidi ana wana. Fuyanna maꞌena Betesiba heyaya sa ginauli mate Peloweta Neitan ya lau lisina. (2 Samuwela 11 yo 12) Aee–, Guyau, em fanufanuha ya ota esegahi, be u nuwa tohatohaꞌegu. Um tau fanuwatohatoha, be egu heyaya u nuwatuhu afuledi,

²Egu heyaya mahudoꞌidi u kaisu afuledi.

³Egu heyaya E sibaidi na fuya ouꞌouli E nuwanuwatuhuidi.

⁴Um moho lisim yai heyaheyaya E ginauli, laulau heyayana matam yai E ginauli; be fuyanna wa falibagu uwen, “Heyaya wa ginauli!” Mate, wa liba dudulai.

⁵Hola tinagu bogana yai ya lau ee–, ena fuya yosigu yai mate haꞌa E heyaya.

⁶Um wa fanuha wananaha bena ma nuwa ofi fahigu E laowa lisim, tabu ya nuwa luwaluwaga; sibasiba um wa fatalahagu.

⁷Egu heyaheyaya u nuwa afuledi. Na u kaisugu, haba E aꞌa.

⁸Nuwagu wa fakamkamna yo yaluwagu wa lau lidiyen, in moho E atahi egu heyaheyaya wa nuwatuhu afuledi be nuwagu ya amna wananaha yo E kwade.

⁹Tabu egu heyaya u itaꞌita lau lisidi, na mahudoꞌina u nuwatuhu afuledi.

¹⁰Aee–, Yaubada, nuwagu yo yaluwagu mahudoꞌina u fafwaufwau fuyoi.

¹¹Tabu u tole hudoꞌiyegu, e Yaluwam Tabuna lisigu yai u lawe hudoꞌiyen.

¹²U saguhigu be em liba, nuwa amnana i abigu. Doha egu fuya nuwabui bwaꞌibwaꞌina yai. Nuwagu u faloholoho fuyoi.

¹³Habahim em laulau tau heyaya E faꞌatadi be haba sa timuli bui lisim.

¹⁴Aee–, Yaubada, lau pono yai u fofofahigu, yo u bobodiyegu na em laulau dudulai debadi yai haba E wana.