Sam keil 9:6-16

⁶Koakeil uvae ral minau, ivupuol, komuas meteimal keil one vi atan sesuk mul. Ka meatin keil e hevobongen moulien one.

⁷Ka Ahi, kei vi asuv houlu ten lises; kei rondan en avet ral keihoen onen keke voumon kot en meatin keil.

⁸Kei losil kat out netan ral min maluen; lei revi usite onen meatin keil ten kantri vasi keil ral min rendemien koa mal.

⁹Ahi Asuv sak ven koakeil meatin sav amumoni keih min keil, kei lei kat revi keil en avong takeih.

¹⁰Ahi Asuv, koakeil akileak, indesinuk, kosakras kovalokovein keil navong umai venuk.

¹¹Rehesau masmas Ahi koa rondan en Hou Saeon. Rehehitehiteni en out vasi en out netan asa kei mumoni.

¹²Ahi mundem kat koakeil akur mahien, en rovobongentei tangien one. Koakeil amum tisa en mesav keil, Ahi hesa kesi min keil.

¹³!Ahi Asuv, em hemahis inau li! Kilei kilea mahien onak koa meatin keil mete tisa enau amumoni minau. Kikulat nau ran matien, Asuv onak,

¹⁴hesakini nakilea malomal en meten meatin keil ten out Serusalem, ka nihiteni min keil tounah vasi koa sakinau namasmasuk. Nasi nau houlu veni kokur koe moulien onak.

¹⁵Meatin keil koa areingeingenuk umot en avul koa akili onen meatin sav vamot vaha ien; ka ai tetapolis koa alingi, rapus lat keil eris.

¹⁶Ahi Asuv, vothot en kei sasen ka mul lei revi usite onen meatin keil. Ka asa koa meatin tatisa amumoni mai iat ris keil.