Sam keil 92:2-14

²En visokon vasi, meselus usil envatien onom, ka vongien vasi, meviteni mun keke komum vasi tounah koa kovat kati.

³Memusau minuk navong mepilei en kitar ka memuas ave venuk.

⁴Inau nasi nau houlu ven sakien keil onom, veni umen koa komumoni mul sakinau namusau ral min sien.

⁵Iahova, umen keil onom avi hetetamen imok, rendemien keil onom mul nesa mok.

⁶Meatin koa vi unu sakras vailea, ka meatin koa vatin tovuol reingeingen tounah keil ekek varei.

⁷Avaseini meatin tisa keil avi houlu suval oumunai tatisa keil ka rolesi suval koakeil amum romaltei aro tahosis, hekatau, Ahi helei rahit usite one ka hou lin keil vasi.

⁸Ka keik, Iahova, isom vi hetetamen imok lisenges.

⁹Iahova, mekilea keke koakeil uvae katuk imat. Vativieh keil onom, keil vasi itetasil ka ivuol.

¹⁰Iahova, avek keih veni kosan keihoen minau, ka korokol kat inau ral min sien.

¹¹Nalong isien onen vativieh keil onak ka nalei kilea keke keihoen one tovuol emun.

¹²Meatin keil koa moulien one mal en metom imoul hesuval vati matou tai, imoul hetaveah hesuval vati avek tai.

¹³Meatin keil ekek asuval vatiai keil koa aluhi amul vesesal en eim onen Iahova, koa amoul en teahu ten Eim Votut onen Ahi orer.

¹⁴Avaseini avi ulmatu tuai, amul veah ason heite en moulien one. Anatin, ales tahosien ka ave keih veah.