Sam keil 66:1-16

¹!Meatin vasi keil ten out netan, mihemasmas Ahi hetal makulien ten sien!

²Mihesau usil isen koa vi hetetamen, mihesan masmasien mini ven hetetamenien onen.

³Mihehiteni min Ahi mihehit, “!Tounah vasi koa komumoni tahos imok! Keihoen onom marite mok, mul sakin vativieh onom keil amaleilei en metom.

⁴Koakeil vasi amul en out netan uva netan minuk, keil amusau masmasuk, amusau masmas isom.”

⁵Almai ka alles asa Ahi mumoni, mormore tounah keil koa mumoni ven meatin keil ten out netan.

⁶Kei viles Atas Tahilhili mai vi atan tames, kei sakin avu orer keil amu koteh Oaisal Sodan en ale. Ekonek rosi ir ven asa kei mumoni.

⁷En keihoen onen, mul losil kat out netan, mul lei kokoe en kantri keil vasi keke koakeil asesein losilkatien onen, anahati lat sasentei keil.

⁸Meatin keil ten out netan, rehemasmas Ahi orer, masmasien orer heha vasin out.

⁹Kei kur koe moulien orer, romaentei tounah vasut ir.

¹⁰Ahi, keik kosan sakvisien min komai. Suval silva koa ahang kan moteini, komotein moulien onomai en sakvisien keil.

¹¹Komaen komai mimot en eitapolis tai, ka koling tounah keil koa meas en eisilomai.

¹²Komaen koakeil avi vativieh ral komai avitan en komai, e memu koteh ahang ka oai. Ka kosa, komul kolah lat komai meva en out ten amas.

¹³Nikur sanien votut hemai en Eim Votut onom ka niniti hehat minuk, nisani minuk asa koa navat kati.

¹⁴Asa koa navat kati minuk navong namul en avong tisa, nisani minuk.

¹⁵Nikur sipsip keil ka ninit keil en ahor ten sanien venuk, ninit buluk ka nani keil emun hesakin vite hetupan hehat venuk.

¹⁶Kami koa mivouhou min Ahi, almai ka allong nau. Nihitehiteni min kami tounah sa koa kei mumoni minau.