Sam keil 63:3-11

³Envatien onom koa korie lati min komai lisenges, kei tahos imok mulin tounah sav keil en moulien onomai, sakini nihati lat isom.

⁴En avong vasi en moulien onak, nisan masmasien onak minuk, navong navis, nihati lat hek keilu hehina nesa hehat venuk.

⁵Neim en tinok, kosakinau nito en tahosien hesuval koa nakan more anien tai ka nalonge tahos, ka nisau en souen keil ten masmasien hehat minuk.

⁶Navong namul en avet, namundem katuk. Vongien va rokol out mulan, namules namundem usiluk.

⁷Namundem usiluk veni lises kovi kataunien minau. Nisau hetal masmasien ven koa kokav koe inau suval toahin tai mul kav koe titan keil en apouen.

⁸Avong vasi, naro kos vesesal venuk, ka hem kur koe inau.

⁹Meatin keil koa asak visi avou vini nau, kumon keil iha netan en out ten matien.

¹⁰Kisakin keil imatmat en vaeen keil, ka kisakin huli rendan keil imai ian teiai one.

¹¹Inau koa nihi asuv houlu ten out Isrel, nihilelau en sien navong nilesi keke Ahi ling koakeil avavae vatal minau en hek. Koakeil amumon hatkatien en isen Ahi ihati lat isen, ka koakeil amul aliluvos, keil ito raeng.