Sam keil 42:3-10

³Meneai ka vongien, namis, ka nasakras maanian. Koakeil alele tisa enau amules avis inau avit, “?Ueee … Ahi onom kave?”

⁴Tinok mis houlu navong namundem usil avong mulamu. Mulamu, namul ral min meatin keil koa meva en Eim Votut. Namulamun keil ka mevilelau en sien, memusau ka memasmasuk, Ahi.

⁵?Nalonge tisa varei vensa? ?Vensa namundemko mukonek? Ka mukos, naling desien onak enuk, Ahi. Nimasmasuk eris, Ahi onak koa komutut nau.

⁶En out koa namul ien kosa, soutin ran out sak, nalonge tisa. Navong namul veah en out Sodan, ka Vatihou Hermon ka Hou Misar, rendemien onak vat eris minuk, Ahi.

⁷Longmahien onak muas nau, suval mari oai koa mue nesa mot muroh en ahat keil netan.

⁸En meneai, Ahi hetie lat envatien onen enau, hesakini, nisau masmasi en vongien. Anatin, nihis minuk, Ahi ten moulien onak.

⁹Ahi koa ring koe nau, nihisi nihit, “?Vensa em vobongenau? ?Vensa namual ral min mahien ven tounah tatisa keil koa meatin tisa keil amumoni minau?”

¹⁰Vativieh keil onak amul aselus karenau ka nalonge navit mamat veni. Lises avis katiat nau avit, “?Ueee … Ahi onom kave?”