Sam keil 27:3-14

³Avaseini keke vangi meatin tavaeen keil imai ikarahit nau, tinok hermaleileitei. Munak koakeil alele tisa enau amea avit avahu vatal minau, desien onak en Ahi hermottei.

⁴Tounah tai, navis Ahi veni; keinges ek vati. Ek vati mok nitos en Eim Votut onen lises en moulien onak. En out enek, metok hel en Ahi onak, en more nan lises, ka nihisi ven kataunien onen.

⁵En avong takeih, inau nito ven Ahi. Kei kur koe nau en Eim Votut onen ka kur revi nau en out tetahos onen.

⁶Hesakini, nilohlin koakeil avit avahu vatal minau. Nisan sanien keil min Ahi Asuv hetal min hisohisoen ten sien; nisau mini ka nimasmasi.

⁷!Ahi Asuv, kitaengonau navong navisok! !Em hemahis nau li, ka kisan aneite ten hisien keil onak!

⁸Tinok raengonuk navong kovit, “!Kimai venau!” Sakini, en tinok, numai venuk ka navisuk.

⁹Konato suaitei ranau. Konavuroh kattei inau, konalei seseintei inau, meatin toumien onom. Ahi koa komutut inau, mulamu, kokataunau; konalokoveintei nau li nanato sasok.

¹⁰Vahesa tata onak keilu mama onak lulokoveinau; ka keik, Ahi Asuv, kilei kat revi nau.

¹¹Ahi Asuv, kihiseinau en asa koa em vati moumoni; ka kilamunau en sise koa meatin tisa keil areingeingeni avousil inau eni.

¹²Konamaentei inau min meatin tisa keil enek. Keil aselus karen inau en luvosien, ka lises avit avouas inau.

¹³Ka asakras, veni nakilea keke nimoul niles tahosien keil onen Ahi.

¹⁴!Kami miheling desien onami en Ahi Asuv! !Mihehati kami hekeih, minandemkotei! Anatin, miheling desien onami eni.