Sam keil 16:1-11

¹Asuv houlu Deved mutisi Ahi Asuv, kikur koe inau, namundesinuk konamaentei tounah tisa nasut nau.

²Naviteni minuk keke, “Keik kovi Asuv onak. Tounah vasi tetahos onak ka venuk.”

³Meatin keil onen Ahi avi votut ka amoreite mok, ek vati mok nito hetal min keil.

⁴Ka koakeil amusil ahi sav keil aleh mahien mai en keil. Navong keil iha netan min ahi one, nirkapiltei hetal keil; ka nirlah ruai tei hetal min keil navong akur sanien keil one.

⁵Ahi Asuv, kosa moulien onak mules en hem; en avong keil koa hemai, namundesinuk kisan tounah natamurei eni.

⁶Ahi, keik kotahos komulin atan vuo tounah sav keil ten out netan koa nakur kati. Inau nakur kat keik enges.

⁷Ahi Asuv, namasmasuk ven korie minau asa numoni. Ka, en vongien emun, nalei kilea sise koa mal.

⁸Ahi Asuv, lises nalinguk mulamun enau; veni koro vesesal, tounah tovuol vasak kulul inau.

⁹Sakini, nasi nau mok, tinok vilelau en sien, ka metauen tovuol enau,

¹⁰veni kokur koe nau ran keihoen ten matien. Lises namum vasi umen koa kosani minau, sakini, konaseseintei nau nihas en out ten matien.

¹¹Kitie minau sise ten moulien. Nalonge tahos imok ven koro ral minau. Vesesal venuk, sien mul lisenges.