Sam keil 145:2-15

²En avong vasi, namasmasuk, ka navou lat isom lises ka lisenges.

³Iahova, keik kovi hetetamen imok, ka mal enges keke masan masmasien vahat minuk. Keik komariso mok ka meatin keil asakras availea vasin keihoen onom.

⁴Asa koa komumoni ven meatin keil, keil ihitehiteni min titae keil. Anatin, keil iselus usil sakien keil onom koa amariso mok.

⁵Keil iselus usil muohien ten hetetamenien onom ka sakien keil onom koa amormoreite, ka inau nindem usil more umen keil onom.

⁶Keil iselus usil mari umen keil onom koa arie lat keihoen onom, ka nihit lat sakien keil onom koa avi hetetamen imok.

⁷Tahosien onom koa marite houmon keil isi keil ka ihit usili min mesav keil, ka isau usil maluen onom hetal min sien.

⁸Iahova, envatien onom mariso ka komul korie lat enmahisien min meatin keil. Keik korvurohtei vakalah, ka kovilelau en envatien.

⁹Iahova, komumoni tahos min meatin vasi keil, ka korie lat enmahisien min koakeil komumon keil.

¹⁰O Iahova, tounah vasi keil koa komumoni isan masmasien hehat minuk. Ka koakeil amusiluk, keil ihati lat isom.

¹¹Keil iselus usil losilkatien onom koa mariso mok, ka ihit usil keihoen onom.

¹²Keil umoni hemukonek keke meatin vasi keil ilea sakien keil koa mul rie lat keihoen onom. Anatin, keil ilea suk keke losilkatien onom mariso mok.

¹³Losilkatien onom hel lisenges, ka kihi asuv houlu onen meatin keil heha vio … hervustei. Iahova, keik komum vasin hatkatien keil onom, ka korie lat envatien onom ka en sakien keil onom.

¹⁴Iahova, keik komul kokataun koakeil avotini keih en moulien one, ka korali lat koakeil keihoen one tovuol emun.

¹⁵Meten meatin keil amul alele vat venuk keke kovalosil kat keil. Ka komul kosan anien min keil en avong koa mal.