Sam keil 145:10-21

¹⁰O Iahova, tounah vasi keil koa komumoni isan masmasien hehat minuk. Ka koakeil amusiluk, keil ihati lat isom.

¹¹Keil iselus usil losilkatien onom koa mariso mok, ka ihit usil keihoen onom.

¹²Keil umoni hemukonek keke meatin vasi keil ilea sakien keil koa mul rie lat keihoen onom. Anatin, keil ilea suk keke losilkatien onom mariso mok.

¹³Losilkatien onom hel lisenges, ka kihi asuv houlu onen meatin keil heha vio … hervustei. Iahova, keik komum vasin hatkatien keil onom, ka korie lat envatien onom ka en sakien keil onom.

¹⁴Iahova, keik komul kokataun koakeil avotini keih en moulien one, ka korali lat koakeil keihoen one tovuol emun.

¹⁵Meten meatin keil amul alele vat venuk keke kovalosil kat keil. Ka komul kosan anien min keil en avong koa mal.

¹⁶Tounah vasi koa amoul en out netan, amul akur asa koa e vati ka en hem.

¹⁷Iahova, sakien keil onom mal revi, ka umen keil onom rie lat enmahisien onom.

¹⁸Keik komul vesesal ven koakeil avis minuk. Anatin, koro vesesal ven koakeil avis minuk ka en tine.

¹⁹Koakeil avouhou minuk, komul kosan asa koa e vati. Keik komul kolong hisoen one ka kumai komutut moulien one.

²⁰Iahova, keik kolei kat revi koakeil e vatuk, ka min koakeil amum tisa, ku lin keil.

²¹Iahova, nimasmasuk lisenges. Ka tounah vasi keil ten out netan ihati lat isom lises ka lisenges.