Sam 9:13-19

¹³(Het) Ke, Zihova, Mu tataru nau, dogoria Goi sa qua tinasigiti pu evaṉa nau rina qua kana. Mu va sare au pa minate,

¹⁴pude maqu tozi vurani rau pa vinarigara tie pa Zerusalema sari doduru vinahesimu Goi, meke kaqu qetuqetu nia rau sa Mua hinarupu.

¹⁵(Tet) Sari na butubutu si gelia rini si keke pou pude va hoqa au, gua, meke ṉovala puleni teledia, tavetia rini si keke sipata pude vagi au, ke koari na dia binalabala kaleadi pu tavete tomei rini si ta vagi tugo si arini.

¹⁶Ele vata gilana pule nia telena koa gita se Zihova pa Nana vinaripitui toṉotona. Ele ṉovala puleni teledia sari na tie kaleadi koari na dia tinavete kaleadi pu va pada ni rini pa votiki tie.

¹⁷(Yod) Kaqu kekere la pa minate sari na tie kaleadi, meke sari na tie huporo pu hoke muliṉi nia sa Tamasa.

¹⁸(Kaph) Sari na habahuala si lopu kaqu ta muliṉae koe Zihova, meke sa inokoro nabuna tadi na habahuala pude tava sare, si kaqu koa hola ninae rane ka rane.

¹⁹Kei Zihova, mae toka nau pude madi lopu koa va mataqara sari na tie. Madi ta pitu gedi pa kenumu Goi sari na butubutu huporodi.