SAM 9:12-20

¹²Buyambam tapa, aminu amin zipa kungwakaing aminde yake toknga yamunggak kapata atnatanggamatanggak. Sike kwanamu ie sikainggengu maaknga dua umukusinggak. Dua umukusiwan aminu aminda toknga aknga yamukaing aminde yake toknga yamunggak.

¹³Siwan Buyambam tapa, iwanata meya nae namukaingge kayo. Na akupitde dapaknga gwa siwan ngana gata nae musip kwikwik natangamuke na tapi take yuwit.

¹⁴Unzingge nata sanga kuupbam gata tasikuyakge yanitakuke gatane umanda yatangenawit. Yatangenake nata Saion yotbam gapmane gwambok gwaune yuke gata na takuyakge apbakngake yanikapit.

¹⁵Sike katum aminda kepdakaatang gapma nin panggaganuwikge kwaiking ngana waaminda ina pimaking. Siakan. Waaminda yapapna nin panangge kaiwan dandakaking. Kaiwan dandakawan ngana yapapnata ina pakut.

¹⁶Anututa inane yuyuknga waaminde tapduu wam yakaing komune yeuyamunggak. Unzingge wai aminda aminu kundu pasiwan mainingge pasikaing ngana Anututa tasiwan sanga wanda tapan tekwamban ina pasiwan maikaing.

¹⁷Wai aminu kuupbamda gwa kumbing aminda yuaing komune paku yutning. Ngan, aminu Anutue masa imukaingu wa kuupbam waomunekan paku yutning.

¹⁸Siwan ngana asingganu Anututa aminu sangaapana wenae dua botawik. Ngan, aminu wa meyambam pake yuaingga Anutue banip siwan ita gatayamikge kayutning. Kayuwawan ita moo dua kapewan yutning.

¹⁹Siwan Anutu, ga apso. Gata aminu dua kapewi gae yamandet tasining. Gata katum aminu pasiwi wam yananga komune yuwawa gata waamindane yuyuknga usanziyo.

²⁰Buyambam tapa, gata pasiwi waaminu asiknga gwautnong. Gata pasiwi aminu kuupbam anzing natapnong, “Ninu amindakan sanga moo binga yuamang.”