Sam 99:4-9

⁴Baṉara heheda, qetu nia Goi gua sapu toṉoto; ele va tana va toṉotia Goi gua sapu garo koari na tie Izireli. Ele evaṉia Goi sa tinoṉoto meke sa lineana koarini.

⁵Vahesia se Zihova sa nada Tamasa; mi hoqa vahesia pa kenuna Sa Nana habohabotuana baṉara! Na hopena si Asa.

⁶Ari Mosese, e Eroni, meke sari tudia si na hiama te Tamasa, meke e Samuela si na tie pu varavara la koa Sa; sari kasa hire si hoke tepatepa la koa Sa, meke avosi Sa si arini.

⁷Zama la koa rini sa Tamasa pa korapana sa lei sapu turu sage guana dedegere lavata, va tabei rini sari na tinarae na ginarunu pu poni ni na tozi ni Sa.

⁸Kei Zihova mami Tamasa, ele olaṉi Goi sari na dia tinepatepa; na Tamasa taleosae si Goi koa rini, ba va kilasi tu Goi sarini koari na dia sinea.

⁹Mada va lavatia se Zihova sa nada Tamasa, mada vahesia si Asa pa Nana toqere hopena. Ura na hopena na viana se Zihova sa nada Tamasa.