Sam 96:2-7

²Mi kera la koe Zihova, mi vahesia! Mi tozi vura nia hopeke rane sa inavoso leana sapu ele harupu gita Sa si gita.

³Tozi vura nia koari doduru butubutu sa Nana linavata, meke sari Nana tinavete marilaedi pu evaṉi Sa.

⁴Ura nomana lavata se Zihova meke garona tugo pude tavahesi, pude pamaṉa nia, hola ni sari na tamasa huporodi.

⁵Ura sari doduru tamasa pu vahesi rina votiki butubutu si na beku mo, ba e Zihova si tavetia sa doduruna sa maṉauru.

⁶Sa ṉinedala variva magasana si koa koa Sa, sa ṉiniraṉira na tinolava si koa koasa Nana vasina hopena.

⁷Mi vahesia se Zihova, gamu na tinoni pa kasia popoa, vahesia sa Nana linavata na ṉiniraṉira.