Sam 94:1-16

¹Kei Zihova, Agoi sa Tamasa sapu tubehe, Mu vata dogoro vura nia sa Mua binugoro.

²Agoi sa Tie Varipitui koari doduru tie, Mu poni koari pu vahesi pule ni gua sapu garodi rini.

³Kei Zihova, vea seunae gua si kaqu koa tava lavata sari na tie kaleadi?

⁴Vea seunae gua si kaqu vahesi pule ni sari na tie variva mate, meke vahesi pule ni koari na dia tinavete kaleadi?

⁵Kei Zihova, ele ṉovala pani hokari rini sari na Mua tie.

⁶Va matei rini sari na naboko, na koburu eapadi, meke va mate pani tugo rini sari na tie karovodi pu koadi pa mami popoa.

⁷Zama si arini, “Lopu dogoro gita e Zihova, meke sa Tamasa te Zekopi si lopu gilania gua sapu evaṉia gita,” gua.

⁸Kei, gamu pu tutaka, mi gilagilana tu ba gamu. Gamu na tie duvili, panavisa kote tumatumae si gamu?

⁹Sa Tamasa pu taveti sari na taliṉada si vegua, lopu avavosae si Asa? Asa sapu taveti sari na matada si vegua, lopu dodogorae tu?

¹⁰Asa sapu norei sari na butubutu huporodi, si vegua, lopu kaqu va kilasi tugo Sa sari kasa nada tie kaleadi? Asa si na Tie Va Tumatumae pa doduru tie; ke vegua, lopu tumatumae si Asa?

¹¹Gilani e Zihova sari na dia binalabala; gilania Sa sapu loke laedi si arini.

¹²Kei Zihova, tamanae tugo sa tie pu nore va toṉotia Goi, meke sa tie pu va tumatumae nia Goi sa Mua tinarae.

¹³Kopu nia Goi si asa koari na rane tinasuna, osolae ta pomunae sari na tie kaleadi.

¹⁴Ura e Zihova si lopu kaqu muliṉi ni sari Nana tie, meke lopu kaqu veko pani Sa sarini pu Tanisa.

¹⁵Sa tinoṉoto si kaqu ta dogoro pule koa rina vinaripitui, meke sari na tie toṉoto si kaqu zuka ia si asa.

¹⁶Esei si turu toka nau koari na tie kaleadi? Esei si turu turaṉau pude varipera koari na tie pu tavetavete va sea?