SAM 92:2-14

²Sike tembana tapduu kuupbam gata nae siknga nataayakge natake umanda yatangenawitde natapa take singgak. Siwan zikaane kuupbamu asinggan nanduyuwayak kakngae yakapitde natapa take singgak.

³Nata gita daka tanguwa gakngae take yawan

⁴Dasingge? Gata nae puya kekeknga tasikuyakge natapa kuwan nata musip gwaang siknga natakengu nata apbakngake kap gae tainggamunggat.

⁵Buyambamtapa, gata puya buyambam siknga pasinggayak. Gatane natdetdetda buyambam siknga.

⁶Sike aminu natdetdetna wena amindanu wai aminu zonga zonga taketa akopning binga ngangu natdetnanga dua.

⁷Ngan, waiaknga tasikaing aminu sangabam pake take yutning. Siwan ngana gata waaminu gatukande pasiwi maining.

⁸Dasingge, Buyambamtapa, gika siknga king kapa asinggan asinggan yuayak.

⁹Ninu atnataamang. Aminu gatane iwanda dakngakaingu waakwau akumning. Ngan, waiaknga tasikaing aminu kuupbamu gata ayaipakepu peya.

¹⁰Siwan ngana gata nae kekeknga buyambam namukuyak. Unzing kekeknga ikwawa gamanu wawi gwendane binga. Gata nae take tasikuyakge na asiknga baknganggat.

¹¹Sike natane iwana pasiwi maiwanu kainata gwa kakum. Siwan gata iwana yapbimbi datakuke kwanamu sikingu maakngata atnatapbum.

¹²Siwan ngana amin noman aminu take siknga, zanggwa dakandakata buya buyambam aakaing binga yutning. Unzing katau buyambam sida ngang yanikaingu tawanu Lebanon komune nana dakandakata buyambam siknga takakaing binga.

¹³Noman aminu waakwau Buyambam tapatane yot gwekatang katau gwa kwaiwan yuking binga yutning. Katau wa dakandaka Anutunindane yotnaatangu take siknga akokaing.

¹⁴Sike katau wa dakandaka damana gwa sike ngana tapuya awasike yuaing. Katau waakwau kekeknga yuke dua kupiakaing. Itane tatakngi gwegwenga asinggan yuke buyana aatning. Unzing, aminu noman aminu aminuake sining ngana kekekake yutning.