Sam 88:4-14

⁴Gua ari doduru si rau sapu tata pa minate, ele beto mo sa qua ṉiniraṉira.

⁵Somanae tava muliuṉu si rau koari na tie matedi, kekeṉoṉo gua ri pu ta seke va mate, sapu eko pa dia lovu. Kekeṉoṉo gua arini pu ele muliṉi ni Goi, ura ele taluarae pa Mua kinopu si arini.

⁶Ele vala nau Goi pa minate si rau, pa korapana sa lovu hupohuporona, vasina sapu huporo dudukurumu.

⁷Sa Mua binugoro si guana bogusu sapu opo tamunau meke kuzu au rini.

⁸Sari na qua baere si va taliri Goi pude hakohako nau si rau; ele vata evaṉae nau Goi na keke tiṉitoṉa bonina si rau koarini; guana ta tuku veko si rau, ke lopu boka govete.

⁹Tava rida sari na mataqu koari na tinasigiti. Kei Zihova, doduru rane si va sagei rau sari na limaqu koa Goi pa vinaravara.

¹⁰Lopu hoke tavete tinavete variva magasadi si Goi koari na tie matedi, meke lopu hoke toa pule sarini pude vahesi Igo.

¹¹Lopu boka ta tarae pa lovu sa Mua tataru nabuna koari na tie matedi, babe ta tozi koarini, sapu kopu ni Goi sari na Mua vina tatara.

¹²Lopu ta dogoro tugo pa korapa hinuporo sari na Mua tinavete variva magasadi, babe sari na Mua lineana pa vasina pu ele ta muliṉae palae.

¹³Kei Zihova, arau si kabo atu koa Goi; pana munumunu si varavara atu si rau.

¹⁴Kei Zihova, na vegua ke veko pani au Goi? Na vegua ke va paere pule Nigo koa rau si Goi?