Sam 83:2-10

²Ura dotu, korapa ṉoveoro pa tinaṉaziri sari na Mua kana, meke sarini pu kukiti Nigo si korapa varipera atu koa Goi.

³Korapa tavete tomei rini sari na dia minizimizi golomodi pude va kilasi sari na Mua tinoni. Korapa kuhana ni rini sari na Mua tie pu lavelave hukata ni Goi.

⁴Zama si arini, “Mae, aria mada va puzulu ia gana sa dia butubutu, pude kaqu ta muliṉae palae hokara gana sa butubutu Izireli ninae rane ka rane,” gua si arini.

⁵Ele variva egoi si arini koasa dia binalabala kineke hie, meke tavetia rini si keke vinariva egoi tadi na kana pude varipera atu koa Goi;

⁶sari na butubutu Edomu na Isimeli; sari na butubutu Moabi meke Haqiraiti,

⁷sari na tie Qebala, Amoni, meke Amaleki, meke ari na Pilisitia, meke Taea.

⁸Ari na tie pa Asiria ba somana la tugo koa rini. Na tie varipera ṉiṉiradi si arini pude koa turaṉi sari na butubutu Moabi meke Amoni pa tutina e Loti.

⁹Mu va kilasa guni ni gedi ari na tie Midiani pu va kilasi e Qitione, meke gua tugo ari Sisera e Zabini pa Ovuku Kisoni.

¹⁰Ele va kilasi Goi sarini pa popoa Edora, meke muzi ta huara vasina sari na tinidia.