Sam 83:10-15

¹⁰Ele va kilasi Goi sarini pa popoa Edora, meke muzi ta huara vasina sari na tinidia.

¹¹Mu evaṉia koari na dia koimata gua sapu tavete ni Goi sari Orebi meke Zebi. Mu va kilasi sari doduru dia tie koimata gua sapu va kilasa guni ni Goi sari Zeba meke Zalamuna

¹²saripu zama guahe: “Kaqu zau vagia pude na nada, sa pepeso te Tamasa,” gua.

¹³Kei qua Tamasa, Mu va talahuarae guni gedi na kavuru pa givusu, Mu guni gedi na hikahika huiti pu givusu pani.

¹⁴Kekeṉoṉo guana nika sapu sulu betoa sa hiqohiqo, meke sa halalana sa nika pu sului sari na toqere,

¹⁵si Mamu hadu va tarazuzui gedi si arini guana raneboṉi. Va holoqoru i gedi si arini guana givusu ṉiburuna.