SAM 79:5-13

⁵Buyambam tapa, gata ninde kaanga nataau mamayasim yuya ba dasing? Asikaya gata kaanga nataau katapda binga isikoke dua kupik, ba dasing?

⁶Asikaya gata kaanga aminu munu dua puke ganikaingge natayamuyo. Ngan, aminu kepna kepna wa yuaingu gae masa gamukaingunin.

⁷Dasingge, dongu waakwakga ninu Jekopdane donga notninu kundu atzipa kumbing. Kupan nindane kepmin kaa asiknga pasiwan maiking.

⁸Nindane bapuninda waiaknga tasikingge ie toknga ma nimim. Apmanu gata ninde musip kwikwik natanimuyo. Dasingge, ninda meya buyak yuke kumnangge dapaknga singgak.

⁹Anutu, ga Anutu, nin pakuyak kapanin. Gikane umanda kopsa akngae natake ninu gatanimuyo. Ninu gika gatuka pake waininu kuupbam sandetnimuyo.

¹⁰Dasingge aminu kepna kepna yuaingga ninu anzingu ninikwaikaing, “Gindane Anutusa zandang yuak,” ngangun. Aminda nisipa notninu kundu daknga tukngwakingge gata yake toknga dongu waakwakge yami kanimde nataamang. Dasingge, wai aminda gatane puya aminda zipa kumbing.

¹¹Gata kaut aminda kwanamu gae sitningge natapso. Sike gikane kekekngaka buyambam taknganeta aminu iwanata atzipan kumningge yakingu gatuka papso.

¹²Sike iwanu waakwakga ga akganisapduking. Unzingge Buyambam tapa, gata yake waiaknga tasikingge meya katau kuutmusa gatu kautdu takngayat ngang yamuyo.

¹³Gata unzing tasiwina ninu gikane amindabamda unzing sipsipbata binga gae gaak wamu asinggan asinggan ganinim. Siwan nindane bapuninu masan aatningga, gae unzakan umanda ayatangenatning.