Sam 77:5-19

⁵Balabala i rau sari na rane pu ele hola, meke sari na vuaheni pukerane.

⁶Pana boṉi si balabala sisigiti pa buloqu si rau; noso meke balabala si rau, meke guahe si balabala ia rau:

⁷“Vea, kaqu etulu pani gami sa Baṉara si gami? Vea, lopu kaqu qetu pule hokara ni gami Sa si gami?

⁸Vea kokoi mo Sa Nana tataru nabuna koa gami? Vea sari nana vina tatara koa gami doduru totoso si beto mo?

⁹Vegua, ele muliṉi nia tu Tamasa si pude koa tataru na taleosae? Vegua, ele hobe nia tinaṉaziri tu Sa sa ṉinoṉo?”

¹⁰Meke zama si rau pa qua binalabala soti, “Sa ta sigiti hola nia rau si hie mo, sapu doṉo guana sa Tamasa Ululuna Hola si lopu tokani gami kamahire.”

¹¹Kei Zihova, kaqu balabala i rau sari na Mua tinavete marilaedi, kaqu balabala pule la i rau sari na tinavete variva magasadi pu ele evaṉi Goi pukerane.

¹²Kaqu koa noso meke balabala va lohi la i rau sari doduru Mua tinavete, meke kaqu balabala i rau sari na Mua tinavete ṉiṉiradi variva magasadi.

¹³Kei Tamasa, hopedi meke viadi sari doduru Mua tinavete; loke tamasa pule si koa sapu noma hola kekeṉoṉo gua Agoi.

¹⁴Agoi mo sa Tamasa sapu taveti sari doduru tinavete variva magasadi, sapu vata dogoro nia sa Mua ṉiniraṉira koari na butubutu.

¹⁵Pa Mua ṉiniraṉira si harupi Goi sari na Mua tie, sari na tie te Zekopi meke na tutina e Zosepa.

¹⁶Kei Tamasa, sipu dogoro Igo rina kolo lamana si Goi, si guana tie matagutudi si arini. Uve sa lamana peava si holoqoru na neneqara.

¹⁷Va hoqa ruku sari na lei, meke ta avoso sa paka maṉauru pa galegalearane; meke malakapi varikali.

¹⁸Totoso lulusu sa paka maṉauru, meke malakapi pa kasia popoa, si neneqara na niniu sa popoa, guana tie tarazuzuna.

¹⁹Ene gua pa kolo si Goi koari na bogusu, karovia Goi sa lamana, ba lopu ta dogoro sari na pou Nenemu.