Sam 77:16-20

¹⁶Kei Tamasa, sipu dogoro Igo rina kolo lamana si Goi, si guana tie matagutudi si arini. Uve sa lamana peava si holoqoru na neneqara.

¹⁷Va hoqa ruku sari na lei, meke ta avoso sa paka maṉauru pa galegalearane; meke malakapi varikali.

¹⁸Totoso lulusu sa paka maṉauru, meke malakapi pa kasia popoa, si neneqara na niniu sa popoa, guana tie tarazuzuna.

¹⁹Ene gua pa kolo si Goi koari na bogusu, karovia Goi sa lamana, ba lopu ta dogoro sari na pou Nenemu.

²⁰Turaṉi Goi sari na Mua tie guana dia sepati pa limadia ari Mosese meke Eroni.