Sam 76:1-9

¹(Keke kinera te Asapa) Sa Tamasa si ta gilanana pa Ziuda, meke sa Pozana si tava lavata pa Izireli.

²Sa Nana vasina soti si pa Zerusalema, meke koa si Asa pa Toqere Zaione.

³Vasina si moku panipani Sa sari na tupi, na lave, meke na magu varipera tadi na Nana kana. Uve, moku panipani Sa sari doduru dia tiṉitoṉa varipera.

⁴Sa Mua ṉinedala si marilaena hola Tamasa, variva magasa si Goi Baṉara sipu pule va mataqara mae koari na toqere, sipu ele va kilasi Goi sari na Mua kana.

⁵Ele va mate betoi Goi sari na tie varipera ṉiṉiradi, meke vagi betoi sari na dia tiṉitoṉa. Meke kamahire si mate beto si arini guana puta pa minate, lopu boka ovuli rini sari na limadia.

⁶Kei Tamasa te Zekopi, sipu norei Goi si arini, si hoqa mate beto sari na dia hose, na tie varipera pu koi koari na hose.

⁷Ba Agoi Zihova si variva matagutu, pana bugoro si Goi, si loke tie si boka turu pa kenumu Goi.

⁸Sa Mua vinaripitui si ta gilanana mae gua tu pa Maṉauru; matagutu sari na tinoni pa pepeso, ke lopu hite ṉudu va ṉada,

⁹totoso vura mae sa Tamasa meke tavetia Sa sa vinaripitui, pude harupi saripu ta ṉoṉovala pa popoa pepeso.