Sam 73:6-22

⁶Ke sa vinahesi pule si guana dia pakupaku vinasari pa ruadia, meke sa ṉinovaṉovala si guana dia poko doduru.

⁷Sari na bulodia si ta siṉie kinaleadi, meke sa kinaleana koari na dia binalabala si loke kokoina.

⁸Hegehegere ni rini sari na votiki tie, meke zama ni rini sari na zinama kaleadi; vahesi pule ni meke va namanama pude balabala vekoa rini pude ṉoṉovali sari na votiki tie.

⁹Zama va kaleana nia rini sa Tamasa pa Maṉauru, ke pa dia zinama si hiva koimata ni rini sari na tie pa kasia popoa.

¹⁰Gua asa, ke luli i rina tie te Tamasa sari na dia hahanana, meke okoro va hinokari rini gua saripu zama ni rini.

¹¹“Uve, lopu kaqu gilania Tamasa gua sapu ta evaṉa. Sa Tamasa Ululuna Hola si lopu kaqu gilania gua sapu evaṉia gita,” gua si arini.

¹²Gugua asa sari na tie kaleadi. Soku hola dia likakalae si arini, meke vagi va soku hola doduru totoso.

¹³Ke loke qua pinia mo si pude kopu pule nau si rau meke koa via pa buloqu, meke pezaku i rau sari na limaqu, pude lopu tavete va kaleana pa tie.

¹⁴Ura doduru totoso si vata sigitau Goi, meke doduru munumunu si va kilasau Goi si arau.

¹⁵Be zama ni rau saripu gua sara si va ilolo pule nau si rau koari na hahanana leadi tadi na Mua tinoni.

¹⁶Podekia rau balabala ia sa tinasuna hie, ba tasuna hola koa rau,

¹⁷osolae nuquru la si rau koasa vasina hopena te Tamasa, meke tiqe gilania rau gua sapu kaqu ta evaṉa koa ri na tie kaleadi.

¹⁸Kaqu va turui Goi si arini pa vasina gulazorona, meke va hoqa huara ineti Goi si arini.

¹⁹Hinoqa ta huarae si arini pa keke totoso papakana mo. Tava mate si arini pa keke minate kalekaleana hola.

²⁰Guana pinutagita mo si arini sapu tapuru taloa pana munumunu, kei Baṉara, sipu vaṉunu Goi, si murimuri taloa si arini.

²¹Sipu ta ṉaziri sari na qua binalabala, meke va gilagila ia rau sa tinasigiti,

²²si duviduvili guana kurukuru ṉame si rau, ke lopu gilanigo rau si Goi.