SAM 73:4-21

⁴Sike waaminu meya takngatu dua kaaing. Aho, waaminu gupnaatangu toknga dua pake gupna kekeknga, siwan takekan yuaing.

⁵Waaminu meya aminu kunduta pakaing binga dua kaaing. Sike aminu kundu meya takngatu takngatu pakaing, siwan ngana meya wa ninu kuupbamda kaamangu wa dua apukaing.

⁶Unzingge waaminda inane umana aknga yapangenakaing. Unzing gupnaapa moo pasibakngake inae apbakngake yuaing. Bakngake yuke aminu kundu yumdekan zipmake pasiwa maikaing.

⁷Sike musipnaatangu sanga yamandet taknga tasinangge nataaingunin tasikaing. Ngan, natetdetnaatangu sanga waiaknga tasinangge nataaingunin tasiwa buyambam siknga singgak.

⁸Gatu waamindakan kundu sapdut wam yanike waiaknga pasiyamunangge yakaingunin. Sike waakwau yamandet siknga siwan kepi takngatu kake aminu kundu pasiwan mainingge yakaingunin.

⁹Waakwakgakan Anutu yekaune yuak kapaaya asinisapdukaing. Sike waakwakgakan inane umana aknga yapangenake aminbamda waakwakga nataaing kaknga tawaningge akekekakaing.

¹⁰Unzingge Anututane aminabamda yamandet sikaing amindane wamna tawaningge yanikaing.

¹¹Sike wai amindanu anzing yakaing, “Sanga ninda tasinim taknga Anututa natapnanga dua. Anutu enane siknga yuak kapatanu sanga ninda tasinim taknga kakapikge kepi wena,” ngang yakaing.

¹²Siwan wai aminda tasikaingu anzing. Waaminu meya takngatu dua kaaing. Dua kake sanga buyambam pakaing, siwan ngana sangana kunduat panangge tasikaing.

¹³Na ninae akgwaumba musipma noman gan yukut. Siwan wai takngatui dua tasikum. Asikaya wa buyana dua aakut ba dasing?

¹⁴Dasingge, Anutu, gata nae toknga kwakngaom gatu zikaane ngang namukuyak. Sike tembana tapduu kuut toknga gatane namukuyak.

¹⁵Sike nata wamu takngatu takngatu wai aminda yakaing kaknga yakum gamu, manggamu nata amindabamu ayuaing aminde kem yanike tanzit tasiwam.

¹⁶Siwan nata nangaakan natake wai aminda tasikaing takngae yapii kanangge tasiwa maiwan meya natapbum.

¹⁷Nata tasitakuusika nata Anututane yotnane kopbum. Koke yuwawa natane natdetdetna kakaa sikut. Siwan waomunea sanga wai aminde aawik takngaenu natapbum.

¹⁸Gata pasiwi waaminu kepi saweknga sikngaapane kukaing. Kuwawa gata pasiwi pimake gatukande maining.

¹⁹Zeetgaman siknga waakwau maiking. Sike kungwau waaknga wai siknga kundu.

²⁰Buyambam tapa, wa mainingu aminu tapatuta mia kaaknga tembana enawan mia waaknga wena zet siknga singgak binga. Ngan, gata aminu waakwau natapi sanga mia kawa wena singgak binga siwik.

²¹Sike nata musip maik natake musipmaatangu wai siknga natapbum.