Sam 71:6-19

⁶Kalavarae si rau koa Goi pa doduruna sa qua tinoa; podalae totoso podo rau, si koa Goi mo si ta kopue rau, kaqu vahesigo rau doduru totoso.

⁷Sa qua tinoa si na vina titila koari sokudi, sina Agoi tugo sa qua aqoroana.

⁸Doduru totoso si vahesigo rau, meke tozi vura nia rau sa Mua tinolava.

⁹Mu lopu etulu pani au, totoso barogoso si rau Mu lopu veko pani au, totoso malohoro si rau.

¹⁰Sari na qua kana si vari vivinei nau, na hiva va mate au rini

¹¹Zama si arini “Lopu koa turaṉia Tamasa si asa kamahire, ke aria, mada hadu lulia, mada la tuqe vagia gana; loke tie si koa pude toka nia,” gua si arini.

¹²Kei Tamasa, Mu lopu koa va seu koa rau. Mu tuturei mae toka nau. Kei qua Tamasa!

¹³Madi tava kilasa, na tava nunala gedi sarini pu korapa podekia pude va mate au; madi tava kurekure, na talotaṉa gedi sarini pu korapa podekia pude va sigitau.

¹⁴Ba arau si lopu kaqu makudo sa qua rinoverove koa Goi, meke kaqu gigiri lala nana tu sa qua vinahesimu Goi.

¹⁵Kaqu tozi vura ni rau pa ṉuzuqu sari na Mua tinavete toṉotodi, ura na soku hola si arini, hola ni gua saripu boka gilani rau, ba kaqu zama vura ni rau doduru totoso sari na Mua tinavete variharupi.

¹⁶Zihova Tamasa; kaqu mae si rau pa Mua Zelepade pude vahesigo koari na Mua tinavete ṉiṉiradi. Kaqu vahesigo rau koasa Mua tinoṉoto soti telemu.

¹⁷Kei Tamasa, ele va tumatumae au Goi podalae sipu kobukoburuqu si rau. Ke lopu kaqu makudo tozi vura ni rau sari na Mua tinavete marilaedi na variva magasadi.

¹⁸Kei Tamasa, Mu lopu muliṉi nau sipu kamoa rau sa binarogoso meke keo sari na kaluqu. Mu koa koa rau osolae tozi vura nia rau sa Mua ṉiniraṉira koari na sinage na sage mae hiroi.

¹⁹Tamasa, sa Mua tinoṉoto si kamo la koari doduru vina podaka pa Maṉauru, ele taveti Goi sari na tinavete nomadi hola. Loke tie si hite pada kamo Igo si Agoi.