SAM 71:2-20

²Ga noman siknga apa. Unzingge gata na gatangamuke na iwanae kataune sandeke gika gatu tapso. Gata tumuk wamae maak pake na gatuka tapso.

³Ga natane suu buyambam kekeknga gwendu binga dakngake yuyo. Yuwawi na gae gepbiatang akopa gata na kakuya tasiyo. Dasingge, na gaekan apuke na kusopuwit. Gata siknga gatangami na take yuwit.

⁴Natane Anutuna, na wai aminde kataune sandeke tapso. Sike waakwau kekeknga siknga siwan yuyuknga wai siknga.

⁵Dasingge? Buyambam tapa, na gaekan baniu singgat. Sike na waatdaka yukum komuneta gae baniu sikum. Siwan baniu wa sikumu apmaat kaa baniu asike yuat.

⁶Asingganu na gae kataune yuke kepi sukunggat. Mingata tangaikut komuneta kakuya tasinggawi apu apman apunggak. Unzingge nata gatane umanda asinggan yatangenawit.

⁷Sike aminbamda meya takngatu takngatu nata kakumu akaaingunin. Kake sanga unzing siknga ninde ba apik, ngang atnataaing. Siwan ngana gatakan na kekeknga siknga kakuya tasinggaak.

⁸Tapduk bamu nata gae umanda yatangenake gatane umanda kopsa aknga aminbamde yanikapmanggat.

⁹Tapduknga na aminuake siwa kekekngana asisangepanu gata na masa ma namuke napmambim.

¹⁰Dasingge, iwanata nutapan kupitde unekan yuke na tasiwan maiwitde wamu yandeking.

¹¹Waaminda anzing yaking, “Anututa masa gwa imuke kukutde kake ninda tawake tanggaganutna. Aminu tapatu andangu dua yuuknga gatangamik,” ngang yaking.

¹²Ayok, Anutu, gata nae maa ma yuwim. Anutuna, gata zaat siknga apuke gatangamuyo.

¹³Nata nataau aminu nae temanggaganupa nanikaingu gata yaipakepuke pasiwi sopuningge nataat. Ngan, waaminda na tasiwan maiwitde tasikaing. Unzingge nata nataau gata natdetdetna pasiwi botake maaknga siknga natapningge nataat.

¹⁴Siwan ngana na gae banip sike asingganu gata gatangamiakgekan ganduyuwit. Sike natanu gatane umanda buyambam siknga yatangenawit.

¹⁵Sike natane genanetanu gata noman taknga tasinggaakge aminbam yanikapit. Gatu gata sangabamu pasikuyak kakngae nangaakan nataat. Siwan ngana undanga. Tapdukbamu gata na takuyakge yaniwit.

¹⁶Anutu, Buyambam tapa, natanu gatane kekekngaka buyambam takngae natake nata umanda ayatangenawit. Sike natanu anzing yakapit, Buyambam tapakan noman tapa unin, ngang yakapit.

¹⁷Anutu, gata tupa na waatdakane nanindamukuyau apu apman kaa unzakan, ge apmanu gata sanga nomanomana tasikuyakge yanikapmanggat.

¹⁸Sike na apmanu aminuake gwa siwa gwapak danggama kwakngakan gwen singgak. Siwan ngana Anutu, gata na ma napmambim. Gaat naat unekan yuke nata gatane kekekngaka buyambam takngae aminu masan aatning aminde yanikapit.

¹⁹Anutu, gatane noman takngaka buyambam siknga enane siknga konggak. Kopan apmanu waaknga aminbamde kaine aanggaman siknga yuak. Sike gata puya buyambam siknga tasikuyak kapanin. Keu andakane nana tapatu ga binga dua yuak. Wena. Gata kuupbam yapbikuyak.

²⁰Gata tasiwi na meya wai siknga takngatu takngatu apa kakum. Siwan ngana na atnataat, gatanu na gatu tapi kekekawit. Unzing na gapma kupsa aminda yuaing katangga binga yuwawa na gatuka tangenawiyak.