Sam 70:1-5

¹Nabz ne Devet kx yrbzle mz kxrmailz ngr dzbe kxnzngrng. Gct, vz-anim mz nzarlapx-krm ninge. Kxetu, rnekim mz nzokatr-krm ninge.

²Okatrp ninge mz nzaovxio-krnge kxnzrpilr na-abzlr ninge, Murde drtqdr namya mzli kc nadwasz-ngrdr ninge.

³X leplz lcng tzxtrnga-ngrdr ninge drtqdr namya Mzli kc nametx-ngrmlr bange.

⁴A' amrlz krkcng tzbrti drtwrdr nim Mz nzrka-krbzme badr nzabrtz-zlwzngr, Murde na-awi-zvz-ngrbzlr bam nzarlapx-krm nidr Mz nzrpi-krbzlr kx, “Gct, nim kx myatxlz-esz'ngr.”

⁵Yawe Gct, trxplr-zvzwxu, x trpnzngr scnge zmatq. Vz-anim, kx Gct. Murde nim txpwz Mevalu rnge. Bzkq asaq nzokatr-krm ninge.