Sam 69:30-36

³⁰Kaqu kera la nia rau si keke kinera vinahesi koasa pozana sa Tamasa. Kaqu va lavatia rau si Asa pa qua zinama leana koa Sa.

³¹Gua asa si variva qetu koasa Tamasa, hola nia sa vina vukivukihi bulumakao babe keke bulumakao kokoreo nomana valeana.

³²Sarini pu ta ṉoṉovala si kaqu dogoria sapu gua asa, meke kaqu koa qetu; gamu pu hata ia sa Tamasa si kaqu ta sovutu va ṉiṉira.

³³Ura avosi e Zihova sarini pu koa pa tinasuna, meke lopu muliṉi ni Sa sari nana tie pu ta pusidi.

³⁴Madi vahesia rina maṉauru na pepeso sa Tamasa, meke gua tugo sari na kolo lamana, meke sari doduru tiṉitoṉa toadi pu koa koarini.

³⁵Ura kaqu harupia Tamasa se Zaione, meke kaqu kuri pulei Sa sari na vasileana nomadi pa Ziuda. Kaqu koa vasina sari na Nana tie pude tagoa sa pepeso vasina.

³⁶Sari na tutidi ri Nana nabulu si kaqu tagoa sa vasina asa, meke sarini pu tataru nia sa Tamasa si kaqu koa vasina.