Sam 68:22-33

²²Zama sa Baṉara, “Kaqu turaṉa pule maeni Rau sarini pu koadi pa Basani; kaqu va pule maei Rau saripu koadi pa hubi lamana,

²³pude mu ovovae ni sari na eharadi; pude sari na mia siki ba kaqu vagi gedi hinia tugo pude meai sari na eharadi rini,” gua si Asa.

²⁴Ke Tamasa, sa Mua inene va mataqara si ta dogoro koari doduru tie, sa puku vinarigara tie te Tamasa sa qua Baṉara sapu ene nuquru pa Nana vasina hopena.

²⁵Sari na tie kerakera si luli pa mudimu Goi, meke sari na vineki pu kizai sari na tabarini si pa kokorapana, meke sari na tie mikemike si luli mumudi mae.

²⁶Mi Vahesia sa Tamasa koari Nana vinarigarae tinoni, gamu na tutina e Zekopi, mi vahesia se Zihova.

²⁷Sa butubutu Benisimane sapu hitekena koari doduru si kekenu, meke luli la sari na koimata pa butubutu Ziuda koasa dia pukuna, meke luli mudi la sari na koimata pa Zeboloni meke Napitalai.

²⁸Ke Tamasa, Mu vata dogoro nia sa Mua ṉiniraṉira; sa Mua ṉiniraṉira gua sapu tavetavete nia Goi koa gami totoso lahe,

²⁹koasa Mua Zelepade pa Zerusalema, vasina atu luari rina baṉara sari na dia vinariponi koa Goi.

³⁰Mu norea sa baṉara pa Izipi sapu gua tugo na basioto pa korapa ovuku, Mu norei sari na butubutu huporo, saripu gua tugo na bulumakao kokoreo pu turaṉa tudia osolae kaqu todoṉo Nigo rini, meke ponigo sari na dia siliva. Mu va talahuarae i sarini pu okoro nia sa vinaripera.

³¹Kaqu vura mae pa Izipi sari na turuhabotu, meke sari na tiena sa Itiopia si kaqu va sagei rini sari na limadia pa vinaravara la koe Tamasa.

³²Mi kera la koe Tamasa, ke gamu na butubutu pa kasia popoa; mi kera vahesia sa Baṉara;

³³vahesia si Asa sapu ene mae pa korapa maṉauru pukeranedi hola. Dotu, va vuraia sa sa mamalaiṉina koari na paka maṉauru.