SAM 68:20-35

²⁰Nisane Anutuninu waapata gatanimuwawan ninu take yuamang. Anutu, Buyambam tapaninu nindane toiknginda, unzing gatanimuke nin papan ninda dua kumnim.

²¹Siakan siknga, Anututa iwana gatukande pasiwan maining. Dasingge, waaminu waiaknga asinggan tawake tasikaing.

²²Sike Buyambam tapata anzing yanggak, “Gindane iwanza Basan kep komune pakapu yuaingu unenana dua. Sike apmea gindane iwanza yanipakapit. Sike yanggabam gwekatang ama kutakngine siknga ba yuaingu, wa unzing, keu maa siknga komune datakuke yuaing binga, wa nata apme pakapit.

²³Siwan ginda iwanza kumzang siknga zipmake kepisata daknga yaiyuk kamunzata iwanzatane daknga takekan ingwamuke naning.”

²⁴Anutu siwan king kapana, gata amau wagwenu tasike yapbike apbakngawi aminbamda kaut kaut yuke ganduwawan gaat amindabampat gatake apukaing. Aminu kunduta ganduwawan gaat amindabampat apu yotdabam patang kokaing.

²⁵Sike aminu gaat gatake apukaingu kunduta kap taikaingu gae tupan kukaing. Siwan gwamemingu kundumaman pakaingu masan apukaing. Sike gatu maya matekga wakumu mateknga dakandakasimu yamayuuk apukaing.

²⁶Sike kap taknga anzing taikaing, Ninu Anututane aminabam, ninu unekan gwa yuamangge Anututane umana yatangenatna. Ninu Isrel nana amin, ninda Buyambam tapanindane umana yatangenatna.

²⁷Sike Benjamindane donga mateknga apaatzimu tupan kukaing. Siwan Judatane tupan amin gatu aminu Juda nana kuut Benjamindane donga pake yawakaing. Siwan tupan aminu Sebulun gatu Naptali tane ngangu masan yawakaing.

²⁸Anutu, gata kekekngaka ninde yeutnimuyo. Tupa kekeknga waakngakaneta gatanimukuyak.

²⁹Sike kingga wamu kundu gatane yotdabamu Jerusalem nana gwende natake ga ganimbakngangge sangaapa kundu moo pakapu gamuning.

³⁰Gata kaap zong gwenu pitam gatang yangga napnapna kaya komune yuak gwenu kaanga iniyo. Ngan, gata aminu wa kau wawi gwegwen ba mateknga gwegwenda binga tasikaing aminu kaanga yaniyo. Kaanga yaniwawina munu gae puke silwa ngang yanikaingu inane pake gamuning. Sike aminu wa amak tangenake tasinangge take siknga nataaing aminu ayanikwasiwi datakunong.

³¹Siwan kingu Isip kep komune nanaapata wam yak amin yaniwan Jerusalem kuke gata puya ita tasiwik kakngae natapningge kuning. Siawan Itiopia nanata gae kataknga tangenake tumuk wam ganining.

³²Ginu aminu dongu kundu kundu yuaingu, ginda Anutue kap taike umana yatangenatnong. Ngan, Buyambam tapae umana yatangenake kap tainong.

³³Sike i ena yekaune kepi sukunggak. Yekau wagwenu tupa siknga yukut. Natapnong. Anututa wamu kekeknga yatewan apunggak.

³⁴Unzingge ginu aminu kepna kepna yuaingga itane kekekngana buyambam takngae yakapnong. Sike i Isrel amindane king tapana. Nindanu itane kekekngana ena yekap gwene tasinggak kaknga ninda akanim.

³⁵Isrel nanatane Anutuna yotnabamnane yuaunin, ge ninda ie asiknga gwaukamang. Ita aminabamde kekeknga buyambam yamunggak. Anututane umana yatangenatnong.