Sam 68:2-17

²gua sapu ta givusu palae sa tuṉaha, si mani hadu taloa ni Sa, guana deana sapu tava kolo pa nika, si mani va matei Sa si arini pa kenuna.

³Ba sari na tie toṉoto si koa qetuqetu pa kenumu Goi; madi koa qetuqetu sisigiti tugo si arini.

⁴Mi kera la koe Tamasa, kera vahesia sa pozana Sa. Mi kera va ululae la koa Sa pu mae habotu koari na lei. Sa Pozana Sa si e Zihova; mi koa qetu pa kenuna Sa.

⁵Sa Tamasa pu koana pa Nana vetu hopena, sina tinokae tadi na eapa meke na naboko.

⁶Poni ni vasina kokoana Sa saripu eapa na naboko, meke vata rupahi Sa saripu ta pusidi; ba sari na tie va guguedi si kaqu koa koasa rimata ṉiṉirana pa vasina ivuluna.

⁷Kei Tamasa, totoso turaṉi Goi sari na Mua tie, sipu ene hola nia rini sa soloso qega,

⁸si niu sa pepeso, meke gore sa luturu pa kenuna sa Tamasa tadi na tie Izireli, pa kenuna sa Tamasa pa toqere Saenai.

⁹Kei Tamasa, na luturu lavata si va gorea Goi, pude va masuru pulea sa pepeso tava tatarana.

¹⁰Sari na Mua tie si kuri sari dia vetu koasa popoa sana; pa korapa Mua lineana si poni Goi sari na habahuala.

¹¹Tozia Tamasa sa Nana zinama, meke soku hola barikaleqe si palekia sa inavosona.

¹²Sari na baṉara meke sa qeto minate si govete, ke vagi rina barikaleqe pa popoa sari na dia likakalae pu ta ṉovala, meke va hihia i rini sari na tiṉitoṉa ta vagidi,

¹³sari na tatapurudi rina kukuva si ta tavetae siliva, meke sari na kaludi si ṉedala meke ta tavetae qolo tolavaena. Arini tugo sari na vinagi tadi pu koa hola tata pa nika koa sa vasina pu koa ia rini.

¹⁴Sipu va hurakatae i sa Tamasa pu tagoi sari doduru ṉiniraṉira sari na baṉara, si va gorea Sa sa sinou pa toqere Zalamoni.

¹⁵Kei Basani! Toqere lavata, sapu soku batu minominona!

¹⁶Na vegua ke doṉodoṉo ta ṉaziri nia tu goi sa toqere sapu vizatia Tamasa pude koa ia Sa? Kaqu koa Baṉara vasina sa Tamasa ninae rane ka rane.

¹⁷Sa Baṉara si gore mae guana pa toqere Saenai koari vurotina na tina totopili varipera, meke nuquru la pa vasina hopena.