SAM 66:2-15

²Sike kap taike itane umana kopsa akngae yakapnong. Itane umana kopsa aknga enane siknga yatangenatnong.

³Anutu anzing ininong, “Sanga kuupbam gata pasinggaunin kake ie kumzang gwaukamang. Gatane kekekngaka buyambam siknga. Unzingge gatane iwanda asiknga gwauke gae kaikane munu pukaing.

⁴Aminu kepna kepna yuaingga gae munu pukaing. Puke gae kap taike gatane umanda yatangenakaing.”

⁵Ginda apuke sanga Anututa pasikuu kanong. Apuke sanga buyambam taknga aknga aminde tasiyamukuu kana inata siknga singgak.

⁶Ita tasiwan yanggabam gwenu atzakngawan kep dakakan sikut. Siwan nindane bapuninu yangga ganzik binga waapane kuking. Unzingge ninda sanga wa tasikut takngae natake baknganim.

⁷Sike i kekekngana buyambam, siwan ita king kapa siwan aminbamu asinggan asinggan kayuak. Unzing aminu kunduta Anutue yamandet sinang ngangge.

⁸Ginu dongu kuupbam, ginu Anutunindane umana asiknga yatangenatnong. Ginda Anututane umana yatangenawan aminbamda natapnong.

⁹Dasingge, ita ninduyuwawan ninu kayuu yukumang. Yuwatna ita dua nindupewan kepi saweknga apane pimakumang.

¹⁰Anutu, gata ninu gwa panziwi sikumang. Unzing aminda silwa ngang yanikaingu katap gwene sawa dapandapana wena siwan kwakwaknga inatakan yuwik binga.

¹¹Gata nindupewi aminda ninu yapapnane gwa panggaganuking. Panggaganuwa gata meya ninde buyambam gwa penimukuyak.

¹²Siwan gata nindane iwanin kapewi ita ninu ayainggamuking. Siwan unzing ninu katapatang yaike gatu yangga paptawan ngana yangga waapane yaikumang binga. Siwan ngana apmanu gata nin keu take noman komune gwa pakapbuyak.

¹³Sanga wa nata gae apakapit. Ngan, nata kaau kuut yotdane pakapuke gae katapatang kuutgan sawit.

¹⁴Dasingge? Meya nae apan sanga katapatang kuutgan sawa kapanga kaya aknga singgau gae ganimbakngawitde natake gamunangge yawa kekekakut.

¹⁵Sike kaau siuknga buyambam gwegwenu alta dakane sake gae gamit. Siwan gatu sipsiu wawi gwegwen sawa itane kapangana takeaknga gae apan natapsa. Gatu ikwawa gamanu wawi gwegwenkat memeat kuut pake gae gamunangge asawit.