SAM 65:1-10

¹Anutu, ninu Saion yot gapmane yuke umanda ninda yatangenatnim. Siwana ninda sanga tupa yana kekekakuu kuupbam tasinim.

²Gata nindane tumuk wamin atnataayak kapanin, ninu aminu kuupbam gae asiknga kunim.

³Gutonga ninda tasikamangu kumzang siknga niipakepbing. Siwan ngana gata gutonga nindane asandetnimuya.

⁴Sike aminu gika yawi yuwan yotdane pake konggayau, waaminu apbaknganing. Gikane yotda wagwekatangu sanga nomana kwaapzang yuaing. Sanga kwaapzangu kake ie musip gwaang siknga natake yuamang.

⁵Anutu, gata gika siknga ninu gatu papi ninu take siknga yuamang. Gata tumuk waminde maak panggayak. Natake puya nin panangge tasikuyak kakngae natake asatnakamang. Sike aminu maa maa kepna kepna yuaingu, gae baniu kekeknga sikaing. Sike yanggabamu kaukaut yuaingga gae baniu kekeknga sikaing.

⁶Gikane kekeknga aknganeta tasiwi tawan dakandaka enake tangine yuking. Gatane kekekngaka buyambam siknga.

⁷Gatu gatakan yanggabam gwenu tasiwi kuma yuak. Ngan, sambui enake tanguwan tapmanggau tasiwi kuma yuak. Ngan, aminda amak ba tasikaing kaya tasiwi wena asinggak.

⁸Gata sanga waakwak tasiwi kake aminbamu maa maa yuaing aminda gae akgwaukaing. Sike gunzitda akonggauneta kuku gunzitda pukunggaune yuaingga sanga kuupbamu gata tasinggayaunin kake yanggamatake gae apbakngakaing.

⁹Gata kepdaka daka katak siknga kayuke sopa kepi waakngane pewi epukaing. Siwan kepdaka tasiwi kayana kwaapzang siwan nanam zakga take siknga enakaing. Anutu, gata yangga kuupbam kepna kepna pekuyau dua zakngakaing. Yangga wanda pasiwan nanamu kwaapzang aawan aminbamda pake nakaing. Sike puya waaknga gata gika tasikuyaunin.

¹⁰Gata sopa nindane puyanine kwaapzang pewi pimakaing. Pimake kepatang pukukaing. Sopa yanggata kepdaka tanguwan wikawan nanamu take enakaing.