Sam 63:1-10

¹O Moroa, nenu ne Moroa rak. Labalak i ngaongao ru. Lorooro axap tarak i vavara ru, atla i ngan laxangka i vat dexes, la i soso vavagam ngan lasa mes. Labalak ik minu ru.

²A vara i do anaba ven u ro at loogu xaala, a vara i do ana ven lolos la lisisixam taram.

³Labalamu lexen taram i lox avukat ti lorooro rak, kuren la anaba emi asu minu.

⁴Nia anaba tong loklox avukat tu at levenmaares axap nia ana rooro ren, la anaba xip aurut lukngak do ana sing u.

⁵Nia anaba lok momo, i ngan nia a lok leluxa la a an mais. La anaba vixan leveng kompixan momo ri leemi asu ru.

⁶Dola nia ak midi ro at loora rak, am doma su ram. At laxanimin axap nia am doma u,

⁷atla nenu uga lok tooro amisix ia, kuren la nia ak pixan mi lomomo ro maxopok at luvapa ram.

⁸Nia at kis pepeve ram la lakngam tino i kubak pe ia basinge limixin munepen minia.

⁹Nedi mo dik lok tong pen i do dina sev amer ia, dinaba rava si axap uto xopok at lemenemen at labarongan.

¹⁰Dinaba met keneng at leesep, la lubung man sio dinaba anan levenbaaxin tadi atnedi.